咖啡退化史

仲記得好細個嘅時候，老豆、阿媽、契爺、契媽四個人，為咗增強戰鬥力（打麻雀），都會飲咖啡提神。阿媽沖嘅即溶咖啡，有時好飲，有時好難飲。唔知點解…

所以我當時對咖啡冇乜興趣。到咗出嚟做野之後，為咗止口痕多過提神嘅關系，都會飲一杯蒸餾咖啡（之後就養成胃痛嘅習慣…）。而對咖啡有興趣，係十年前轉咗公司，接觸意大利咖啡開始。我仲好記得公司開張前一日，我臨急臨忙，喺到整緊個餐牌。我打電話俾郭生問：

「喂！Cappuccino 中文係乜呀？」

「應該係意大利泡沫咖啡呀。」（當時我唔識打中文，立即捉住個路人甲幫我打。）

「咁 Latte 呢？」

「台灣叫拿鐵，你都係唔好啦。叫熱奶咖啡啦！」

不過真正愛上咖啡，喺去過意大利渡蜜月之後，嗰到是但一間咖啡店嘅咖啡都好好飲。然後再加上郭生呢一位熱愛咖啡嘅好朋友，因此我就走上咗呢條不…歸…路…。

起初，因為我地鐘意飲 Cappuccino，所以我買咗以下呢舊野去煲 Espresso（特濃咖啡）。原理係用蒸氣嘅壓力，將啲水由下面，穿過啲磨好嘅咖啡粉，去到上面。煮嘅過程好好玩，就好似做科學實驗一樣。

不過要煮得好，真係好難。由火候至壓粉嘅力度，變化可以好大。所以之後買咗一部家用式嘅特濃咖啡機，即係星巴克嗰啲，不過平好多好多，而且化學好多！但問題同之前嗰「舊野」一樣，平野冇好野。而且之後要洗好麻煩。所以最後，部機就送咗去堆填區…

之後，我就另結新歡。學人玩虹吸（Syphon）。令我對虹吸有興趣，係因為更似做科學實驗。為咗令實驗進行得更方便順利，我唔用酒精燈，因為太煩。郭生去台灣幫我買咗個虹吸配備：「石油氣爐」，真係超一流嘅組合。入嘅係打火機氣，點火非常清潔方便。

唔好睇少右邊嘅手攪磨豆器。日本貨，石磨係陶瓷造，設計精密。磨出嚟嘅粉大小一致。要沖一杯好嘅咖啡，咖啡磨成點有好大嘅影響。

虹吸嘅原理係啲水經布製嘅濾膜去到上層，跟啲咖啡粉混合，煮成咖啡。當煮好，只要攞走個火，下面嗰層因冷卻而變成真空，上層嘅咖啡就會被吸落去。咖啡渣就會留喺上面嘅濾膜。要做好一杯咖啡，都唔算好難。但時間要掌握得好。

不過虹吸有一個缺點，就係更麻煩！之前要搞一大輪，之後又要洗餐矇。塊濾膜洗完仲要用清水浸，保存喺雪櫃入面。所以我向郭生引入咗另一種技術：手沖！

道理上好簡單，同普通蒸餾咖啡機一樣。用熱水直接沖落啲咖啡粉上面，經過濾器，就成為一杯咖啡。

雖然好似好簡單，不過技巧上係最難。水嘅溫度、落水嘅速度、咖啡粉嘅吸水程度等等，可以令味道有好大分別。

由最麻煩嘅沖煮方法，去到比較簡單嘅煮法，好明顯，我已經中毒太深，只求一杯到口。所以到咗最後，我選擇咗我阿媽嘅方法：「即溶咖啡」！

（死未…？）以我本人嘅口味，我覺得 Maxim 真係唔錯。之前飲佢嘅三合一，但因為飲得幾多，成本都幾貴。所以我搵到以上嘅組合，我覺得係最好飲！但以上兩隻野並非易買。韓國出嘅 Maxim 要喺吉之島買。日版嘅唔同味。Marim 就要去 Apita。

希望我對咖啡因嘅渴求，可以到此為止。否則的話，相信我最後只可以靠呢樣野啦…：

（哈哈哈哈哈哈…）



~ Lindberg