溫暖的維他奶廣告

「好耐冇睇過咁開心嘅廣告啦。」

「死佬，因為人地靚女咋？！」

「冇嘅事！唔好睇得我咁膚淺！」

「爸爸，做乜您塊面紅晒嘅？」

作為一個成功嘅廣告，最緊要令人有個深刻嘅印象。而要做得好，一個清晰嘅形象就好重要。呢個廣告，未睇到個牌子，我已經問係唔係維他奶。其實一啲都唔難想象，除咗佢係一個深入民心嘅本地品牌之外，本身形象貫徹始終，畫面見到一大班好開心嘅笑面，見到都心內暖，好容易就聯想起維他奶。所以我覺得佢拍得好成功。而喺廣告時段，可以睇到一個咁開心嘅廣告，真係可以用心曠神怡去形容。比起可口可樂嘅動畫，更加提神。比起《香港力量》，更加有力量。

我覺得最精彩係臨尾一句歌詞：「延繼到秋冬，Stand by me。」維他奶對於好多人嚟講（尤其是我地嗰代—「以為仲好後生代」），相信都係冬天嘅飲品。學校放小息嘅時候，跑到操場嘅小食部，一支熱維他奶，一包炒米（乾到冇維他奶一定哽死！），不知為幾多個寒冬帶來絲絲嘅溫暖。依家正值夏天尾，令人好想快啲到秋冬，手上攞住支溫暖嘅熱維他奶。非常人生啊…



~ Lindberg