大潭道落山王

上星期日去石澳沙灘游水，俾我發現咗「大潭道落山王」。真係快得好緊要，完全追唔到。佢俾我嘅感覺就好似《頭文字D》嘅藤原拓海一樣，大家都係業務車，大家都係日日開住同一段路，大家都係要載住啲好易散嘅野。我叫佢做「亡靈快車」，因為佢正正係一部……棺材車。

事發當日，我由石澳道轉入大潭道。前面見到一架慢駛中嘅儐儀館車輛（附近就係歌連臣角火葬場）。心諗，跟著架慢車，有排都返唔到屋企。話雖如此，不過速度都還可以接受。當時，我仲未知道自己係有眼不識泰山。過多幾個彎之後，我見到原來佢係推住前面一架平治，仲要推得好貼。俾我係架平治，第一時間當然係想加速擺脫。但見佢俾人推成咁，相信係有心冇力。當倒後鏡只係見到：「X府治喪」四個字，點到佢唔讓路呀？

平治駛入避車處。「亡靈快車」同我都抽頭過。冇咗架慢車頂住，我倆全速前進。

自問自己手車都唔錯，而且「細威」亦都算幾好力。記得之前停喺街邊，有一個小朋友問媽媽：「媽媽，跑車嚟㗎？」一架保養得咁好嘅 94 年 Civic 當然好型，但最重要係入面車手嘅魅力。就等於米高舒密加開住一架保母車，你都會覺得係一部一級方程式賽車。

但「亡靈快車」真係好快。直路都勉強跟得住，一到彎位就輸晒。再過多兩個 Z 字彎，就連人地嘅車尾燈都見唔到。感覺就好似高橋啟介望著拓海嘅車尾燈，消失於黑暗中一樣…

 

如果大家日後有機會行呢一段路，而發現倒後鏡只係睇到四隻中文字，緊記讓路俾：「大潭道落山王」呀！



~ Lindberg