七月十四遇上污漕野…

以下故事非常恐怖，絕對真人真事，親身經歷。睇之前，一定要有心理準備。因為故事同鬼怪……無關。

七月十四日嘅早上，Jayson 唔係好肯食飯。返學途中扭計，然後有輕微嘔吐，搞到婆婆一身都係。所以只好折返屋企。其實 Jayson 扭計扭得太厲害，都會有機會嘔。見佢都幾精神，所以都沒有特別為意。點知，原來係惡夢嘅開始…

當晚，我去咗聽講座，所以冇返到屋企食飯。好彩我冇返屋企，先可以（暫時）避過一劫。當晚發生咗件好恐怖嘅事…… 就係 Jayson 肚瀉！冇見到當時場面，可能唔覺得有乜咁恐怖。但可以用一個字去形容：「噴！」

我地以為只係因為佢為食，亂放野入口。見佢都幾好精神，而且又冇再痾嘔，所以冇去求醫。

第二日，Jayson 好似唔係好舒服，朝早瞓唔到回籠覺。大便唔算太過稀爛。見佢扭計，都唔知係唔係扮野想逃學。不過都俾佢休息多一日啦。

嗰晚，真正嘅惡夢就開始啦。Jayson 媽、公公、細姨姨（當晚一齊食飯）都半夜起身，又痾又嘔。第二朝，Jayson 媽話周身骨痛，要請一日病假。於是我地照常放 Jayson 喺婆婆到。Jayson 媽就返屋企休息，公公就去睇醫生。到朝早十一點左右，婆婆話 Jayson 又嘔。醫生話公公係感冒菌入腸。當時我就相信係全部人都係嗰晚中咗 Jayson 啲「毒」。我見婆婆都有啲攰，於是就自己一個人帶佢去睇醫生。

見完醫生之後，佢都話冇乜特別野可以做。近排都好興腸病毒。痾嘔會持續五日左右。只好食稀粥，奶就可免則免，因為消化唔到。開咗啲止嘔藥同腸胃藥。

我抱住 Jayson 去睇醫生嘅時候，忍唔住錫咗佢幾啖。當時立即心知不妙，但覺得應該冇咁易出事呱。點知就咁就出事…

嗰晚，婆婆宣布失守，去埋睇醫生。第四日，終於輪到我。雖然我慣於「將小痛放到最大」，但真係好辛苦。而且唔係我一個咁講，其他病友（除咗 Jayson 唔識講之外）都係咁話。周身骨痛，瞓得唔好，又痾又嘔，我仲要發燒添！以前真係未試過咁辛苦。

好彩，個病休息咗一兩日之後，就好番好多。當我發病嘅時候，Jayson 媽已經好番，可以照顧 Jayson。而我尋日都好番好多，今日除咗未有胃口，反應慢啲之外，但大致上都冇乜問題。Jayson 今日都精神番好多。而最意外嘅收獲，就係我輕咗五磅！

呢個可謂我平生遇到，最恐怖嘅七月十四…



~ Lindberg