大人の科学25号 Twin Lens Reflex

「爸爸，您又有新玩具呀？」

「呵呵呵呵…」

大人の科学嘅玩具，屋企都有唔少。針孔相機都有兩部（其中一部係另一個牌子）。追求嘅，當然唔係科學精神，而係一部二、三百蚊嘅塑膠玩具。呢期第 25 期，好快就賣晒。相信係因為大家嘅好奇心，加上相比是但一部玩具相機，大人の科学真係平得多。而且仲有得自己組合，幾抵呀！我呢部等咗我兩個月，見崇光突然番貨，仲唔即刻去俾錢！

其實雙鏡片都唔係有咩特別。一塊鏡用嚟觀景，另一塊就落菲林。唔同單鏡反光，原則上少咗塊反射鏡，反應會快啲同震少啲。玩起上嚟都幾得意，因為景觀係左右倒轉，所以要構圖都幾考功夫。

我用咗大半小時嘅時間去組合呢部機。非常好玩！好後悔冇買多一部嚟做「後備」。砌完之後，發現雖係只係一舊玩具，但結構非常認真。比起 Black Bird, Fly Twin Lens Reflex 嘅觀景器，後者簡直可以用搵笨去形容！大人の科学「真」好多！

見天色好，用咗兩日嘅時間，高速地影晒 36 張菲林。睇下啲製成品先…

貓。對焦方面，最近可以 50cm。對得準，中間都幾明廓。

廟。我發現影遠景，中清周圍朦嘅情況比較明顯。

部相機冇得校光圈快門。入咗筒乜野 ISO 嘅菲林，就影到乜野相。所以好可能會有曝光不足嘅現象。

不過其實如果真係有心去校，都可以喺光圈做手腳。裡面有一塊有個洞嘅膠片，攞走佢，光圈咪等於大啲囉。而塊膠可以放喺鏡片前或鏡片後。對相片嘅黑角，有特別嘅影響。不過對我嚟講，唔好搞咁多野啦。

Jayson。幾準！嘩哈哈哈哈哈…

跟著媽媽走。相機要放喺腰間，從上望落去。因為觀景位置比較細，對焦有一定難度。而且要打橫影，基本上冇乜可能。除非用腳架慢慢玩啦。

花。走得太近，好易對錯焦。

窗。正因為菲林珍貴，所以影起上嚟都會用心啲去搵野影嘅…

小朋友。快門唔知有幾快。我估有 1/60 秒或以下。所以影小朋友或有動感嘅畫面都得。

「哥哥，你幾號電話呀？」

「我有心上人㗎啦！」

總括嚟講，對於一個貪玩嘅人，呢部相機真係超晒值。但要影到靚相，真係要睇個天。當然，高手嘅技術亦都好重要。如果再番貨，我會買多一部，等 Jayson 大個之後俾佢玩。呵呵呵呵…



~ Lindberg