無牌駕駛

呢架係我架戰車。睇落發唔發覺有啲乜野唔妥？

星期六下午，我開車去接 Jayson 媽放工。行經告士打道，前面有架車炒起咗一個發泡膠箱嘅蓋。因為嚟得好突然，我都盡量收慢，俾佢喺我車底過。心諗，一塊發泡膠邊到傷到我呀！

之後塊野又俾後面炒起咗，最後我見佢黐咗喺人地架車嘅車頂架上面。果然頑強！

去到 Jayson 媽公司，佢已經落定嚟等我。佢用一個好奇怪嘅眼光望住車廂中嘅我。佢入嚟之後話：「您架車好似有啲唔同，搞到我唔知係唔係您…」我話：「傻啦，您今朝先坐住返工。」然後佢驚訝地話：「您唔見咗個車牌呀！」

我即刻飛身落車去睇一睇。原來真係俾個死人發泡膠蓋打飛咗我前面個車牌！感覺好奇怪。Jayson 媽話架車型咗，就好似落場嘅跑車一樣。而我就覺得好似冇拉褲鏈出街，由銅鑼灣遊街遊到薄扶林。所有人都見到，係得我一個唔知！瘀到爆！

之後唯有硬住頭皮開返屋企，叫親戚幫我整返。一路上，手心冒汗。好驚俾差佬睇到，盡量貼近前面架車。途中都有俾對面車嘅人見到，然後指指點點。十級樣衰呀！之後發現原來冇帶銀包！！！如果真係俾警察捉到，真係水洗都唔清喇…



~ Lindberg