新居大改造 之 拆樓篇

可以用四個字去形容：「夷為平地」。

之前好多人都話我浪費。啲裝修原本都用得，唔洗整咁多啦。但一拆落去，就知決定冇錯。首先睇一睇個客廁天花。一打開個假天花，一大塊石屎跌落嚟。鋼筋露晒出嚟，好明顯之前上面浸過。

再睇主廁天花，都有同一個問題。

起晒啲地磚之後，發現原來啲電線都冇入牆！全部放晒喺地就算！

變相啲電都要全部做過。之前個業主仲話自己花咗幾多心機同錢去裝修。如果佢唔係俾人搵笨，就好明顯係我俾佢搵笨！唉…

Jayson 房拆完之後，感覺大咗好多。之後可能喺宜家買張小朋友嘅檯同椅，一個衣櫃，最多買張床俾佢學自己瞓。留多啲空間俾佢玩。

廚房拆完都係咁細。之後都唔知點算。唉…

值得慶幸嘅係，洛文幫我搵咗個幾細心嘅師父。例如廁所啲鋼筋，佢幫我油咗幾層防鏽油。之後再補番好。

其他野都好似好細心。雖然時間係長咗少少，但慢工出細貨，而且見佢都出好多人，都應該唔洗太過擔心。

泥水水電依家都進行得如火如荼。如無意外，（因為中間有個農曆新年）三月中應該完工。



~ Lindberg