我的普魯斯特問卷

終於有 Blog Tag 接啦！其實火羽所指嘅某人，咪就係我囉。早幾日睇過一篇關於普魯斯特問卷嘅網誌，覺得好得意。自己好想玩，就又冇時間寫。第一時間當然諗起火羽，佢就起咗個 Blog Tag。

轉載自 szekiu 嘅網誌：

普魯斯特問卷：著名的Proust
Questionnaire（普魯斯特問卷）由一系列問題組成，問題包括被提問者的生活、思想、價值觀及人生經驗等。因著作《追憶逝水年華》而聞名的
Marcel
Proust並不是這份問卷的發明者，但這份問卷因為他特別的答案而出名，並在當年時髦的巴黎人沙龍中頗為流行。因此後人將這份問卷命名為“Proust
Questionnaire”。

這是我的答案:
1.你認為最完美的快樂是怎樣的？
沒有代價的快樂。之前有冇唔緊要，最緊要之後冇。

2.你最希望擁有哪種才華？
繪畫。如果我識畫，就可以將我啲鬼主意畫晒出嚟！發啦！

3.你最恐懼的是什麼？
洗奶樽。準備瞓覺嘅時候，突然發現未洗奶樽。好驚㗎！其次係蟑螂。

4.你目前的心境怎樣？
心慌慌。搵朝唔得晏。

5.還在世的人中你最欽佩的是誰？
辻仁成。其實我唔識佢係邊個，不過佢老婆係中山美穗…。

6.你認為自己最偉大的成就是什麼？
我有諗過係唔係開咗幾間餐廳，養活百幾人。不過近年生意麻麻。所以唔算係乜野成就。Jayson 又未大個，唔知會變成點樣一個人。所以現時嚟講，應該係成家立室。老婆肥肥白白，間屋又唔會好臭咁啦…

7.你自己的哪個特點讓你最覺得痛恨？
三日香。如果我有多啲恆心，地球應該統一咗。

8.你最喜歡的旅行是哪一次？
希臘。好多貓！隨手都有一隻。

9.你最痛恨別人的什麼特點？
自私自利。人人都係咁，點做得到「大同世界」？其實我覺得自私自利嘅層面好廣。有錢人也好、窮人也好、病人也好。人之初，性本貪。所以我鐘意禮記嘅禮運篇。（我唔似咁有文化呢？）
《禮記 · 禮運篇》
大道之行也，天下為公。選賢與能，講信修睦。故人不獨親其親，不獨子其子。使老有所終，壯有所用，幼有所長，矜寡孤獨廢疾者皆有所養。男人分，女有歸。貨，惡其棄於地也，不必藏於己；力，惡其不出於身也，不必為己。是故謀閉而不興，盜竊亂賊而不作。故外戶而不閉。是謂大同。
翻譯：“大道實行的時代，天下為天下人所共有。選舉有德行的人和有才能的人來治理天下，人們之間講究信用，和睦相處。所以人們不只把自己的親人當親人，不只把自己的兒女當作兒女這樣使老年人能夠安享天年，使社年人有貢獻才力的地方，使年幼的人能得到良好的教育，使年老無偶、年幼無父、年老無子和殘廢的人都能得到供養。男子各儘自己的職分，女子各有自己的夫家。人們不願讓財物委棄於無用之地，但不一定要收藏在自己家裡。人們擔心有力使不上，但不一定是為了自己。因此，陰謀詭計被抑製而無法實現，劫奪偷盜殺人越貨的壞事不會出現，所以連住宅外的大門也可以不關。這樣的社會就叫做大同世界。“

10.你最珍惜的財產是什麼？
健康。

11.你最奢侈的是什麼？
應該係食。食落肚就最實際。但咁又唔真係算奢侈喎… 咁呀… 有三部針孔相機啦！

12.你認為程度最淺的痛苦是什麼？
跌咗個一蚊落坑渠。咪住！一蚊都係痛咗少少，都係兩毫啦。

13.你認為哪種美德是被過高的評估的？
義。真正嘅義氣，唔係人人都明白同做得到。

14.你最喜歡的職業是什麼？
芭蕾舞蹈員。

大家可能奇怪點解唔係地球大統領。但呢份並非一份好工呀，好辛苦㗎！最好做啲唔洗用腦嘅工作，例如車衣工人、鐘錶裝配技工、收銀員等等。

15.你對自己的外表哪一點不滿意？
我沒有六尺高…

16.你最後悔的事情是什麼？
俾 Lucky（我屋企以前隻貓）食啲野太鹹。

17.還在世的人中你最鄙視的是誰？
仲洗問嘅？喬治布殊！其次係啲唔守規則嘅人。包括：搞女人或細路嘅仆街、轉線唔打燈嘅司機。一樣係死罪！

18.你最喜歡男性身上的什麼品質？
豪爽！唔係心口有毛、視錢財為糞土、或者不拘小節嗰啲咁簡單嘅豪爽。而係對身邊嘅人嘅關懷、體貼、重情重義嘅豪爽。唔明？睇下我就知啦。

19.你使用過的最多的單詞或者是詞語是什麼？
痴筋。

20.你最喜歡女性身上的什麼品質？
溫柔。對唔住，我比較膚淺。

21.你最傷痛的事是什麼？
阿威走咗。

22.你最看重朋友的什麼特點？
毫無懷疑的支持。例如：
「我想買…」
「買啦！」
「我都未話想買乜！」
「唔理你想要乜，我講乜，最後你都係買㗎啦！」
「好兄弟！」

23.你這一生中最愛的人或東西是什麼？
自己。（起碼我誠實！）

24.你希望以什麼樣的方式死去？
Armageddon。可以同所有親友一齊去見閻羅王，雖然要排隊要耐啲，但應該好開心。

25.何時何地讓你感覺到最快樂？
Canon Showroom。其次係自己張床，聽到枕邊人嘅呼吸聲。

26. 如果有下輩子你希望成為甚麼(人或物)?
做有人疼的短毛貓。長毛好難打理，又要嘔毛球。不過最好唔洗閹啦。喵嗚…

27.如果你能選擇的話，你希望讓什麼重現？
長年被埋沒咗嘅腹肌。不過都唔知脂肪層下面有冇野… 其次係長毛象等嘅史前動物。如果地球有動物要絕種，應該絕咗我地先。咁地球會靚好多。

28.你的座右銘是什麼？
冇喎… 咁老土… 而且我時時變㗎嘛。

有興趣玩嘅朋友，自己接一下啦！用心都做，都幾發人深省㗎。



~ Lindberg