八仙過大海 之 美食篇

原本想寫行程，但發現成個行程都係食！所以都係寫「食程」算數。哈！

今次一行八個家庭，分批出發去澳門。我地坐十點鐘嗰班船，但途中遇到垃圾捲入引擎，搞到我地喺最大浪嘅西環對開海面，拋咗大半個鐘。搞到同行嘅 Mavis 嘔晒電。

到埗之後，我地因為聯絡唔到其他人，就先行到酒店落腳。天不停下住雨，心情原本應該同個天一樣咁灰，但有兩個小朋友走來走去，都唔會灰得去邊啦。

其他人原來一早到咗，喺威尼斯人度假村行緊。當時已經差不多一點，肚皮打晒鼓嘅我，當然主張去醫五臟廟先啦。

我地住金都酒店，喺氹仔嗰邊。嚟到氹仔，當然要去食水蟹粥。雖然落住雨，等嘅人都好多。因為實在太過肚餓，我抱住 Jayson 去食咗個免費嘅自助餐（鉅記試食）。Jayson 食到一口都係蛋卷，個樣好好笑。

誠昌飯店
地址：氹仔官也街28-30號地下

依我嘅記憶，水蟹粥好似以前好食啲。近兩年已經冇咁鮮甜。唔知係同啲蟹有關，定係食過幾次，已經冇乜驚喜。但今次人多，所以可以叫碟肉蟹伊麵。啲蟹肉好實好甜，非常好味。但價錢都幾驚人，大約要二三百蚊一碟。

除此之外，仲食咗黃金蝦。隻蝦大隻到呀！好味！

喺官也街食得飽飽，當然例牌要去食大菜榚做甜品。

莫義記地址：氹仔官也街9A號地下
Jayson 自己揀咗個士多啤梨味嘅大菜榚。

雨不停咁落，大家都冇晒主意去邊到玩。突然有人提意去食豬扒包。據聞附近有間，好過「嗰」間大排檔。雖然已經飽到上心口，既然冇其他好去處，就去望一望啦。

新好利美食餅店
地址：氹仔地堡街13-14號

入到餐廳之後，Jayson 不停扭住話：唔坐。咁就當然啦。食完又食，真係當佢傻嘅咩。而飽到上心口嘅我，因為真係再食唔落，只係隨便叫咗一個豬扒包、葡撻、同一杯紅豆冰。豬扒包都幾好味，但有人覺得佢唔夠胞。原來呢間野最出名係葡撻同燕窩蛋撻。葡撻超新鮮，入面啲蛋仲係水汪汪。我鐘意食葡撻，除咗係佢個酥皮，仲有上面燶燶嘅焦糖味。好食！

亦好彩有杯紅豆冰，Jayson 先可以乖乖坐低。

大家再一次食飽之後，就返酒店休息一下。原本諗住 4:30pm 再出發，到賽車博物館睇下。點知坐酒店車到碼頭嘅時候，幾乎所有小朋友都瞓晒！

咁冇別辦法啦。唯有提早到今晚食晚飯嘅地方，一邊休息，一邊等食啦。突然覺得自己有啲似北京填鴨，不停咁食。

自助山 The Grand Buffet地址：中區葡京路2-4號新葡京酒店2樓

雖然因為係自助餐，而取其名「自助山」，但我一啲都唔覺佢係一座山，簡真係一條「街」！我未試過食自助餐食到不停咁咒罵：洗唔洗咁長呀！食物品種好多。有香港自助餐常見嘅，亦有一啲我地中國嘅地道美食。可惜甜品嘅選擇就唔係太多。

有幾樣野係值得推介。燒肉好味！大頭蝦好好味！蟹腳好好好味！燒牛肉好好好好味！我喺第二次喺自助餐食咁多燒牛肉。上一次係喺港畔餐廳，食燒和牛。今次嗰啲都好香，好有肉味。

今晚除咗食，我地仲「順便」慶祝及補祝埋 Jayson 媽同 Mavis 嘅生日添。

返到酒店之後，班小朋友就繼續玩。其實只要有一個地方，不論喺邊到，佢地都玩得咁開心。

第二朝，原本諗住好天就去游水。但因為有啲人怕凍或麻煩，最後只有 Mavis 落咗水。其他人就去搵早餐食。我地先到新濠天地，點知原來呢到未起好，除咗啲商店，乜都冇！於是就行番過威尼斯人度假村，起碼嗰邊有個美食廣場呀嘛。

琳琅美食廣場地址：路氹威尼斯人度假村酒店琳琅美食廣場2樓

我喺「好好運茶餐廳」買咗個通粉餐，「"和"越式牛肉粉」買咗個雞絲紮肉河，同喺「Boost Juice Bars」買咗杯草莓雜飲。啲野食都幾貴，但冇辦法啦。米B好好笑，喺咁望住我碗河粉。於是我就餵佢食咗好幾啖，好冧！呵呵呵呵呵…

食過「早餐」，其實已經十一點九。我地行番過新濠天地，睇佢嘅天幕表演。高清嘅電腦動畫，有老虎同龍飛來飛去，做得非常唔錯。但有一半嘅小朋友，因為有啲怕怕，所以中途已經行咗出去。

返到酒店攞行李，又係食午飯嘅時候！嚟到澳門，當然要食番餐葡國菜。聽台長嘅介紹，到咗一間幾特別嘅地方…

文員網球會利安餐廳地址：下環民國大馬路14號1樓

一個字：「得」！啲野好好食！

下面嗰隻雞，有啲似我國嘅八寶鴨。入面啲飯用雞嘅內臟炒過，再灌番入隻雞裡面燒。好好味。

起初以為會好貴。因為食咗超多野，而且上面隻雞已經要二百蚊。點知埋單每人都只係 $110 左右。抵呀！台長果然冇介紹錯。

澳門啲豬仔麵包真係好好食。外脆內軟，有好香嘅麵包味。

而對 Jayson 嚟講，望住米B已經好開心。

呢間餐廳嘅唯一唔好處，就係偏僻。如果好天，沿海邊行出去坐巴士都還可以。落住雨就真係掃興少少。我地上咗巴士之後，所有人都企晒起身，讓座俾我地。真係有啲唔好意思。
最後嘅目的地，係大三巴嗰頭買手信。如果唔太大雨，就帶班細路上大三巴。點知個天冇理會過我地嘅感受，繼續落大雨。加上有啲小朋友瞓咗，所以我地搵咗一個最好嘅避雨嘅地方…

麥當奴地址：中區板樟堂前地22號地下

咁就結束咗我地兩日嘅「八仙過大海」之旅。雖然兩日都落住大雨，但有美食、同一大班大小朋友，去到邊到咁開心啦！



~ Lindberg