滅蟲霸王 2000

夏天將到，住喺山邊嘅我哋，就會開始有好多飛蟲嚟探訪。尋晚陪 Jayson 瞓嘅時候，一望上天花板，我「嘩」一聲叫咗出嚟。好大隻不明飛行物體呀！

為免俾 Julie 見到之後發癲，而且更唔想佢趁我瞓著，飛入我個口到。於是，我就攞出「滅蟲霸王 2000」，即手提吸塵機。將佢吸咗去異次元空間。

之前如果吸咗啲烏蠅之類嘅物體，我會好小心咁，向馬桶傾倒。通常佢哋暈暈地，都可以直接送佢哋到西方極樂。但今次捉蟲就真係捉蟲啦。隻不明物體好大隻，唔知仲以為係外太空生物。所以我只好用保鮮紙，包住吸塵機嘅入口，以防佢爬出嚟報仇。然後留番俾…工人姐姐第二朝處置啦。嘻嘻…

聽日，都係要點啲香茅味嘅香薰先得。聽講話會驅蟲喎。



~ Lindberg