食之無味

我懷疑我同「處女座 」嘅沙加有仇。今年才過咗三個月，每個月都要中佢嗰招「天舞寶輪」。對於唔係好認識《聖鬥士》嘅朋友，黃金聖鬥士仙女座沙加 其中一招絕招「天舞寶輪」，可以用嚟剝奪對手嘅六大感官。而我被佢剝奪咗…味覺。

年頭中咗流感，冇咗嗅覺，只係食到甜酸苦辣。上個月俾炸雞翼入面嘅滾油焯到條脷。起初以為少事，點知足足一個月食唔出鹹甜。剛剛先好番，前幾日又因為公司其中一間餐廳關門大吉，可能清場嘅時候太多灰塵，搞到個鼻又衰咗。再次食之無味。唉…

而另一邊箱，近來工作上，都一樣乏味。業主加租，人工越來越高，又無人願意入行，即使餐廳有生意，但都非常難做。

我記得好耐以前有個業主同我講過，佢話如果俾佢知道可以搾到個租客，有乜理由唔搾到盡呀？如果搾到一萬，個舖位可以賣多五百萬，一千蚊都同你搾到盡呀！望住佢，雖然好無奈，但我都好欣賞佢嘅坦白。結果，佢真係搾得好盡，然後賣咗間舖。新業主同新租客後來先知道中咗招。

有令人乏味嘅業主，亦都有令人乏味嘅租客。嗰個就係我老闆。最近餐廳關門大吉嘅時候，佢貼咗張字條喺門口，大概嘅意思係「業主要我哋俾好多錢，所以我哋無奈地要結業喇。」臨尾攞彩嘅行為，我覺得好幼稚。其實呢個業主嘅要求唔算過份。但奈何舖位太大，我哋點都做唔夠數，唯有交番個舖位俾人。仲要害我之後要同業主解釋點解講啲咁嘅說話，真係樣衰到爆。

慶幸嘅係最低工資對我哋無影響。但近日聽到啲關於休息日及飯鐘嘅爭議，都感到好無奈。其實我唔贊成立法，因為我覺得市場「應該」可以調節得到。而且有啲職位，真係要喺某個低工資水平先可以圍到皮，亦都會有人唔介意用佢哋多餘嘅時間，去換取呢啲比較微薄嘅收入。如果強行要一個最低工資，某啲職位就會無咗。嗰啲人連賺取微薄收入嘅機會都冇埋。要等達到另一個平衡點，呢啲工作先會慢慢走出嚟。但到時可能又要上調最低工資。

但奈何部份工種，市場供求達唔到一個合理嘅調節，咁唯有立法加以干預啦。（所以我係唔贊成，但支持立法。）近日關於某茶餐廳嘅言論，作為資方，我都感到幾有口難言。聽見電台評論員話（如果我冇記錯）餐廳有二千個員工，其中只有四百個員工達唔到要求。做乜唔加俾佢哋，要做啲改合約嘅小動作呢？呢位電台嘅朋友，可能對商業社會唔係好了解。 加人工，永遠唔係一個人嘅事。當呢四百個人加咗人工，佢哋對上嗰四百個一定要加。到頭來，所有餐廳基層員工都要加人工。都咪話唔驚㗎。所以茶餐廳咁樣做，我只可以付諸同情。

正所謂食得鹹魚抵得渴。但我食之無味… 條脷幾時先好番呢？



~ Lindberg