生日遊科學館

今年 Jayson 媽嘅生日節目係去 Yamm 食自助早午餐，然後帶 Jayson 去科學館玩。自從有咗 Jayson 之後，自己嘅慶祝節目都已經俾埋佢玩。不過都俾得好願意嘅，因為有佢嘅參與，真係會高興好多嘅。

「大佬，洗唔洗咁 chok 呀？」

Yamm 啲野食無乜值得深入報導。只可以話唔貴，大人：$338 一位。可能環境嘅因素，都已經扣咗分。喺暗黑嘅環境下食早午餐，人都無咁精神。食物講得出嘅都有，生蠔魚生等。款式好多，不過質素一般。飲品方面有不知名嘅香檳、雞尾酒、及果汁等等。甜品有 Jayson 最喜歡嘅 Macaroon，不過除咗雪榚之外，其他甜品都係麻麻地。中間果舊茘枝「野」（Lychee Crumble），近乎超難食。一分錢一分貨啦。

雖然唔係太過好食，俾咗錢都係要盡情咁食㗎。食到飽到上心口之後，我哋就起行去科學館。雖然都好耐無嚟，但跟印象中嘅科學館差不多。

我覺得香港科學館啲展品都做得幾好，除咗可以展示科學原理之外，設計及用料都好耐用。過咗咁多年都算保養得唔錯。有啲展品搬咗位，由展示科學原理變咗小朋友玩意。比較新嘅有呢個鏡館，入面有個鏡迷宮，Jayson 玩完一次又一次。

「好驚呀！得番個頭！」

人肉萬花筒？都幾靚喎…

好多個 Jayson 同 Jayson 媽！莫非呢個就係叫做：黐黐呆呆坐埋一枱？

雖然 Jayson 未明白眼前嘅野，不過佢都好有興趣咁跟住我哋慢慢行，慢慢睇。

「聞到咩呀？」

「聽到咩呀？」

「覺得暈唔暈呀？」

之後我哋就去咗最高層嘅兒童遊樂區玩咗一陣。

以前解釋表面張力，依家變咗普通嘅吹波波…

最後，玩埋呢個「輕功水上漂」（行得越大力，啲燈就會熄滅），我哋就返屋企喇。

當日冇同 Jayson 媽切蛋糕。第二日係佢嘅農曆生日，我去聖安娜買咗個比利時55°朱古力 [夾心]朱古力 Truffle 車厘子薄脆蛋糕俾佢切。（個名咁鬼長，叫人點叫？！）

雖然只得 55%朱古力，但唔算好重奶味或好甜。有朱古力味，亦唔會好苦。Jayson 好鐘意食。

食完之後，有人變咗鬍鬚佬。哈哈哈…

~ Lindberg