衝破百萬大關

足足用咗四年零十一個月，係四年零十一個月，我嘅網誌點擊次數終於過咗一百萬大關！雖然時間係長咗啲，而且同人哋過千萬點擊仲有好大段距離，不過對於一個咁懶嘅博客，又唔會主動去「開拓」新讀者，有咁嘅成績，我已經好心滿意足。

非常多謝各位網友多年嚟嘅鼎力支持，及對我哋一家人嘅關心。本網誌由最原先嘅少男日記，變咗湊仔血淚史。有時鐘意寫下呢樣，有時鐘意又寫下嗰樣。網誌變咗我哋家庭生活嘅一部份，跟身邊所有人嘅一種聯系。我會好好珍惜呢份聯系，令網誌精神繼續發揚光大。

喺不久嘅將來，我會繼續同大家分享我對統治地球嘅理念。而另一方面，節瓜俠要保護人類，並非係我隨口咁講。原本諗住等佢三歲嘅時候同大家解釋一下，點知唔記得咗…。唯有等四歲記得先啦。嘩哈哈哈哈…

~ Lindberg