發惡夢

近排經常發惡夢，次次都被嚇醒。基本上，任何星系外星人侵略地球嘅情景我都見過哂。雖然發惡夢一啲都唔好受，但卻俾我模擬咗外星人入侵嘅各種方法。喺我征服地球之前，佢哋休想可以分到一杯羹！

發惡夢嘅原因，不外乎幾個原因，例如睇咗恐怖片。前排喺電視睇番《強戰世界 War of the Worlds》，劇中嗰種無助嘅感覺，都真係幾唔舒服。可能我覺得自己同男主角（湯告魯斯）有啲相似，所以發夢就自自然然代入咗佢個角色。

喺夢中，我見到一大班青綠色嘅大頭外星人，個個都揸住啲毀天滅地嘅武器。一開槍，街上嘅人就化為灰燼。當時我喺阿媽屋企，眼見末日即將降臨嘅時候，我大叫 Jayson 媽，問 Jayson 喺邊。喺嗰一刻，我只係希望可以一家人喺埋一齊，攬埋一舊講最後一聲「我愛您」。可惜，佢話 Jayson 喺自己屋企。心裡一沉，咁就醒咗。抹去一額冷汗，心叫好彩係發夢，否則獨留子女在家，監都有得我哋坐…

另一個可能導致發惡夢見嘅原因，我覺得同心口受壓有關。有時可能因為瞓得唔好，精神抗奮或緊張，都好自然會交叉手瞓覺。就好似啲嬰兒要搵啲野壓住個心口，先會瞓得好。或者同出世前喺媽咪個肚入面，俾佢包住嘅感覺有關。但壓住個心口，我發現好多時都會發惡夢。今次見到好大架嘅宇宙飛船侵略地球。不過人類都唔弱，向飛船投進一桶桶發青光嘅核廢料。飛船爆炸，人類得到勝利，但一地都係核廢料…。

然而除咗自己瞓得唔好，會交叉手瞓之外，外來嘅「壓力」都有好大嘅影響…

有時啲惡夢仲會有異味添。唉…



~ Lindberg