中秋閃光燈飾

呢排日日揸車，發現越揸越低EQ。有兩樣野我係一定頂唔順：1) 切線唔打燈；2) 亂裝超白車頭燈。今晚又多一樣：超光車尾燈。

切線唔打燈無品乞人憎，無需多講。但係比起亂裝超白車頭燈，我覺得後者更為無品。

其實好耐之前新聞都有講過呢個問題。好多超白燈都裝得唔好，會照得太高。由於超白燈比較光同刺眼，照住對面車或者前面架車的倒後鏡都好危險。

其實有幾過份？可以用我今日行隧道做一個例子。我個車頭燈照住人地個屁股，高唔過人地個車尾箱。一定照唔親人地。而我前面架 Jazz，個焦點係邊我睇唔到，但係我見到佢左右連隧道天花都俾佢照白晒。我真係替佢前面那位可憐。

而我每次遇到對面車有如此問題，我都會做一個好誇張的表情，扮遮住對眼。等對面見到，希望佢良心發現，睇下自己架車有乜問題。

但係今晚發現樣更利害的！不過需要車同人的「配合」。

今晚行告士打道勁塞車。前面有架 Elgrand。兩邊煞車燈好光。不過還可接受，塞車時，最多望埋一二邊。但係好衰唔衰，行下停下。而前面個司機隻腳超「厲害」！不停又踩又放，速度之快，無出其右。即使架車無 ABS 系統，亦能做出其效果。於是兩邊煞車燈仲閃過聖誕燈飾。加埋本身又光，真係差點閃到我發羊吊。我絕對無誇張呀！

之後我挑戰自己。我發現佢煞車燈光到可以穿過我架車，反映係後面架小巴車頭上。於是我就只係望住自己塊倒後鏡行車。見後面小巴車頭反映到前面煞車著燈，我就煞車。就咁，我行了半條告士打道。行到尾，我差不多可以靠小巴的反映，分辨前後三車的距離。痴痴地線！哈！

塞完半個鐘和被「中秋閃光燈煞車」（應節呀！）閃過過百次之後，對眼好痛。依家對眼好似仲睇到兩個印。救命呀！

我覺得呢個應該唔係我一個人的問題。究竟又有幾多意外係由此而起？其實係唔係要等到因為咁而撞車死人，政府先肯出手呢？


~ Lindberg