自助手卷壽司派對

記得中學時期，香港開始興壽司呢樣美食。而身為學生，（唔似得依家啲年青人）邊到有錢到壽司店光顧呀。所以我地一班同學好鐘意自己用張竹席整太卷。每逢班上有乜活動，我地都會整一大堆出嚟分享一下。入面嘅材料都花盡心思，例如蟹柳、青瓜、厚煎蛋等。不過要整都幾麻煩。所以之後好多年都冇做過，直至尋晚嘅「自助壽司派對」。

以前曾經睇過一套卡通片（已經唔記得係乜），劇中一家人，買咗好多豐富材料，搞咗個手卷壽司派對。要做傳統手握壽司，真係有相當嘅難度。而做太卷都真係幾麻煩。但做手卷就唔同啦，相比嚟講簡單好多。而且可以每個人隨自己喜好，落手落腳自己整，真係幾過癮㗎。

今次我買咗三文魚、蝦籽、蟹柳、青瓜、生菜、奇妙醬。其實做法都好簡單，之前去壽司店見過啲師父做，自己一試就已經得喇。

先放一小堆醋飯喺「適當」位置（非常重要）。然後放自己鐘意嘅食材。

（張檯亂到呢… 唔好見笑。）

一卷。搞掂！食得！

準備功夫除咗買材料同煲飯之外，其實都只係洗洗切切，非常方便。比起一班人食外賣薄餅有趣得多！要做好自助壽司派對，有幾點要注意：

• 人要多。先可以買多幾款食材。（得兩個人真係食到嘔…）
• 材料要新鮮，處理妥當。
• 每個人記得要洗乾淨對手！
• 紫菜最好買啲靚嘅（唔識就睇價錢啦）。到要食嘅時候先開，咁就又新鮮又脆喇。一大塊正方型可以中間切開。
• 手快有，手慢冇！
• 盡量唔好食剩野。如果不幸用剩嘅材料，記住之後唔好生食啦！

~ Lindberg