自製 $68 虹吸奶茶

早幾日，郭生俾咗一篇（失實）報道我睇。報道指深井有間士多，奶茶賣一杯 $68。報導之所以失實，係因為記（作）者話佢用虹吸，睇過尋日嘅《東張西望》，就知道冇咁嘅事。但搞到有個低能仔真係走去用虹吸試做一杯奶茶…

篇報道只係提咗幾個重點：

1. 用虹吸
2. 先用清水蒸煮一次
3. 茶粉有 English Breakfast 同紅茶
4. 淡奶要預先坐熱
5. 所有器皿都要預熱

我於是就有樣學樣。先用清水蒸煮一次。加上我嘅虹吸係煮開咖啡，塊濾膜又懶得換，所以用清水蒸煮一次都好。

然後就整熱啲淡奶。超級市場只係買到「三花牌」，總好過冇啦…

茶葉方面就厲害啦！我搵嚟兩個茶包！右邊係一個相信過咗期十年嘅紅茶包… 剪開茶包，放喺碟中待用。

當我睇到篇報道話用虹吸，心諗都有道理。因為塊濾膜咁密，係做一杯濃滑奶茶其中一個原素。蒸洗完之後，當新水再滾上虹吸嘅頂部，我就落茶葉。

時間方面，通常我煮咖啡就用一分鐘。但茶就當然唔得。作為第一次嘗試，我用咗兩分鐘…

攞開個火，因為啲茶葉冇咖啡咁碎，啲茶好快就流晒落去。茶色望落去唔係好夠。但奈何唔可以煮多次上去，唯有硬著頭皮，照樣繼續。

最後倒落預熱嘅淡奶入面。除咗茶色，聞落嘅茶香都唔多夠。落糖之後飲一口，真係「嘩…」一聲。同飲奶差不多，勉強叫做有些少茶味。非常失望…

睇完尋日嘅電視示範之後，我極之有理由相信，個記（作）者係抄錯人地嘅筆記。人地完全唔係咁做！邊有用虹吸啫？！可惜我搵唔番篇文章，睇下係邊間報館咁大整蠱！但話雖如此，以上實驗過程都幾好玩。我相信會試多次。下次會搵啲靚啲（而且未過期）嘅茶葉，再控制時間好少少。相信未必做唔到一杯似樣啲嘅奶茶！



~ Lindberg