大家樂 之 三隻小豬

真係多得「大家樂」，我相信我會轉行食齋。善哉善哉…

其實我一直忍咗好耐唔出聲，但接二連三嘅沖擊，我真係再忍唔住啦！我好想知佢用邊間（咁醒嘅）廣告公司，點解咁嘅廣告都拍得出。而作為一間餐飲公司，咁都唔覺得有問題咩？正當我同 Jayson講《三隻小豬》嘅故事，電視廣告就見到一隻二隻三隻可愛嘅小肥豬，跳落水好開心咁游水。轉個頭就變咗塊肉，再轉個頭就放落油到炸！天啊！雖然拍得好靚，但我自己睇完立即冇晒胃口。

醇香酥排菜飯：

「爸爸，三隻小豬呢？」

「咪去咗豬小弟屋企游水囉…」

「大野狼呢？」

「…（咪去斬啲小豬，然後落鍋炸囉…）」

「一家人係唔係開開心心咁生活落去呀？」

「…（當然開心啦。不過係俾隻大野狼開開心心食咗落肚囉！）」

好彩 Jayson 未識問，否則我真係唔知點答（我寧願佢問我佢喺邊到嚟）。

廣告故事首尾呼應，咁可愛嘅小豬，俾你斬完，仲要落油炸。點會提起我對食物嘅興趣？就算唔係自己做飲食業，只係常人用常識去諗，我都唔會放啲生（或未煮熟）嘅野出嚟做宣傳，更如唔會俾人客有以上（同我一樣）嘅聯想。正所謂：「寧俾人知，莫俾人見」。而我並非係一個「極端」愛護動物嘅人，我都好鐘意食肉。食完之後，最多心懷感激。但唔好俾我食緊佢嘅時候，見到（或諗起）佢個仔囉…

而大家樂除咗以上近期嘅一個廣告，以前都用過同樣嘅手法。

海南功夫雞：呢個帶搞笑成份都還好。

御品鰻魚飯：魚都算喇。而且廣告中，生前都叫做好好對待過啲魚。加上鏡頭冇咁「露骨」。

咖哩乳飼牛坑腩：呢個我又係「超級」頂唔順。同小豬嘅問題一樣，而臨尾仲要一家大細望住你，話：「同你喺大家樂見」？！如果啲牛識講野，你話佢地會講乜呀啦？

救命啊！（呢句我講嘅！）



~ Lindberg