病 x 忙

記得最初寫網誌嘅時候，十世都出唔到一篇。但自從 Jayson 出世之後，每日都有新鮮事，多多時間都寫唔晒，一日出一篇都唔只。但近年 Jayson 大個咗，需要多啲時間陪佢玩，如果經常對住部電腦，我驚我會小命不保。但一個星期三篇，都應該做得到。

前排出得慢咗，就收到投訴電話：「喂，你病咗呀？！點解冇出 Blog 嘅？！」多謝熙爸嘅關心，雖然我真係病咗，最重要都係好鬼忙啫。

其實以上呢段野，已經係三個月前寫好咗嘅開頭，但一直無機會寫埋落去。自從新年以來，我都不停咁病。最初都係普通嘅傷風感冒。但大約喺六月嘅期間，突然有氣管敏感，之後仲變咗鼻敏感。由咳到甩肺，變到講唔到野（因為鼻塞）。搞咗足足三個月，先搵到個醫生醫得好。但以前明明無鼻敏感㗎…，做乜會無端端有嘅呢？莫非真係抵擋力差咗？！唉…

而工作方面，因為租約紛紛到期，我真係一個頭變成兩個大。做我飲食呢行，可以深深感受到社會變化帶來嘅沖擊。物價高漲，最低工資，人手短缺，問責氣氛等等，都叫人好頭痛。但最無奈嘅都係對住班業主。過去幾個月，分別處理咗五份租約。除咗一、兩個業主比較理性之外，其他都真係…無話可說。一個可以用白痴不切實際去形容（係佢自己啲員工所講），一個係社會嘅寄生蟲（係啲地產自己講），仲有個攞命嘅二世祖。我並唔仇富，但對住一班咁嘅業主，再望下現今嘅社會，眼角不禁都有啲淚光。唉…

其實除咗自己，身邊啲兄弟都遇到工作嘅問題。我曾經想用 My Little Airport 嘅《西西弗斯之歌 》去互相勉勵一下。但好可惜，我哋幾個都唔係西西弗斯。大家眼前嘅工作，即使我哋係心理變態，橫睇掂睇都好難用享受去形容。

（但呢隻歌有一個好唔要得嘅觀念。如果懲罰可以被享受，地獄就再冇意義㗎啦。）

唯一可以慶幸嘅，就係啲病好得八八九九。我仲發掘咗一樣新嗜好：烏克麗麗（Ukulele 夏威夷小吉他）。呢件樂曲好易上手，彈出嘅音調仲令人有開心愉快嘅感覺。每晚彈十幾分鐘，人都輕鬆好多。但最重要係有家人嘅支持啦。即使分唔到憂，有佢哋喺身邊，人生都開心有意義啲。哈哈…

~ Lindberg