五十四日環遊美加 之 昔日的紐約

離開費城之後，我地坐巴士向紐約出發。每當去到一個新地方，我地都首先搵地方落腳。因為冇乜錢嘅關系，我地今次又住青年旅館。今次呢間據稱好近黑人區，所以先咁平。但去到之後，感覺還可以接受。

嚟到紐約，當然要到各地標參觀下啦。時代廣場、帝國大廈、交易中心、洛克斐勒中心（Rockefeller Center）和前面的普羅米修士神像（Prometheus Statue）等等。

其中當然唔少得呢一度…

相信冇辦法再可以影到呢張相。因為以上正是：世貿中心。

而令我地最深刻嘅，都係嗰度的物價。當年，我地已經識用「老麥指數」去評估當地物價。紐約嘅老麥真係好貴！貴到完全唔捨得食。但我地又唔識得搵平野食，所以唯有喺旅館附近嘅超級市場，買料整三文治，然後入老麥買杯汽水，坐喺到靜靜咁（偷）食。

喺紐約，我地通常以地鐵代步。不過對佢嘅印象好差，唔乾淨兼有陣味。覺得香港嘅文明好多。

去到一個自由嘅國家，當然唔少得去探望一下自由神像啦。我地從入面行樓梯到頭冠嘅位，入面都幾迫。上到頂，由頭冠細細嘅窗口望出去，一片自由嘅領域，感覺除咗辛苦之外，……冇乜特別。

下面左邊一幅相，喺當年《運財智叻星》嘅題目。佢遮住咗啲字，只係話俾人知放喺地鐵入閘口外面，叫人估係乜。睇到啲字，大家都知係乜啦。其實塊板真係超級核突。道理上係叫人唔好入閘後食香口膠，吐到周圍都係。但吐得中個目標都仲好少少，吐唔中就攞命啦。而且口水又多，臭到死。俾著依家咁多款流感，一定冇可能咁搞啦！

下一站：我們的終極加油站：多倫多



~ Lindberg