台灣之旅： 第二晚 橫掃饒河街夜市

喺「Baby Boss」玩完之後，由京華城購物中心行過去饒河街夜市，大約十五分鐘。

相對士林夜市，我比較喜歡呢度。因為食物比較集中，可以由街頭掃到街尾，又由街尾掃番轉頭先走。

我鐘意食香口嘢，當然唔會放過「繼光香香雞」。細細粒，容易食！

「魷魚大王」冇乜特別。同樣係冇魷魚味嘅魷魚，香港嘅咖哩魷魚出色得多。

最大嘅驚喜係俾我搵到一檔令我讚歎嘅日式手卷店。

首先手捲口味非常多，雖然賣點唔係乜嘢日本直送新鮮魚生，但勝在配搭精彩，均一價台幣 40 元。而且除咗壽司飯之外，姐姐仲放咗大量椰菜絲。

有椰菜絲嘅手捲真係第一次食，清新嘅感覺真係難以形容。最難得嘅係有咁多材料選擇，有啲仲要煎炸。但姐姐一啲都冇手忙腳亂，地方好清潔。我感動到行完整條街，飽到上心口之後，都堅持要食多一卷。而且普遍街頭美食都冇乜蔬菜類，整一卷淨椰菜絲卷真係令良心好過得多呢。

陳董藥燉排骨。眼前一大碗「T-骨」，要配搭佢哋嘅特製豆辨醬更加好味哦！雖然叫藥燉排骨，但啲湯好甘甜，並冇濃濃嘅藥味。

而肉燥飯就幾「重口味」。我發現台灣啲豬嘅膻味好重，加上肥膏都照加入啲肉燥裡面，唔係一般香港人都接受得到。

兩個人好似食極都唔飽咁。好彩今次都有帶手推車，Jayson 瞓咗都唔怕，可以令到我哋安心掃街。

我對最出名嘅「胡椒餅」反而冇乜興趣。

一個一個黐哂喺個爐壁上，好搞笑。但我覺得味道就一般。但勝在熱辣辣，所以好多人排隊買。

食咗咁多嘢之後，我哋買咗杯蜂蜜柑桔消一消滯。然後再買多碗湯丸番酒店做甜品。真係超滿足呀！



~ Lindberg