3DS 帶來的健康生活

自從買咗 3DS 之後，我覺得身體好咗。因為…

3DS 為咗鼓勵玩家隨時帶機喺身，所以佢內置咗一個「萬步計」。每行一百步，就會有一個金幣（每日最多十個）。有啲遊戲，需要用呢啲金幣去買野，先至有野玩。唔行，就乜都無。因此，我依家每朝都行路返公司。由 Jayson 學校行返去，大約需要行十五至二十分鐘，二千幾步。真係可以話超額完成（每日行一千步就夠）。但當做下運動，都算唔錯。好多時，都可以行上一萬步。都咪話唔攰㗎。

另一方面，3DS 仲有一個好邪惡嘅功能：StreetPass。因為有佢，就更加需要隨身帶住部 3DS。正如 Wii 一樣，3DS 都可以整自己嗰樣嘅 Mii。Mii 可以開放俾身邊嘅 3DS 自動下載。亦即係話，如果兩部「陌生」嘅 3DS 相遇（只要大約30米範圍內），對方嘅 Mii 就會自動下載落自己部機入面。喺遊戲上，StreetPass 可以有廣泛嘅應用，例如放「任天狗」，就可以同其他人啲狗仔玩。而跟機都已經有一個遊戲，叫做 StreetPass Mii Plaza。就因為呢個遊戲，我需要攞住部機，喺人流高嘅地方遊蕩，希望可以「收集」到其他人嘅 Mii，去繼續玩呢個遊戲。老麥、188 等都係理想嘅「勾搭」地方。好快，我就有一隊軍隊同我殺落去個 dungeon 㗎啦！！嘩哈哈哈… 呵呵呵呵…



~ Lindberg