生日飯@君好

差不多每一個月，我同 Jayson 契爺一班舊同學，都會約出嚟食飯。今個月，契爺話想搵自助餐。但見依家啲自助餐都好貴，無從入手。俾我無意之間，喺 Openrice 隨便搵下，搵到一間咁嘅野：

君好扒燒西餐廳 Grill Cafe
地址：灣仔摩理臣山道23號南洋酒店2樓
電話：2831 1280

「等我影下有咩食先…」

呢到嘅半自助餐，包括任食前菜及甜品，一款扒類主食。我見個價錢由 $25X 起，就叫契爺研究一下。佢竟然二話不說就訂咗。喺全不知情之下，呢間餐廳帶來好多驚喜。

首先，飲品豐富。每人包一杯餐酒、一杯餐前或餐後酒、及一杯咖啡或茶。四個人就已經俾一支紅酒，雖然我唔飲得，但見到都好高興。如果嚟慶祝生日，每四個人仲會俾一磅蛋糕！所以極之適合一大班人嚟吃喝。可惜我哋冇預先訂到蛋糕，所以冇得食。

前菜選擇雖然唔多，但沙律、凍肉、餐湯等，食完都已經半飽。之後，主菜就嚟啦！我起初以為只係普普通通一塊牛扒，原來係用石燒。

經理好細心咁講解煎牛扒嘅方法。煎好之後，可以放上牛油或香草牛油，令牛扒更加香。

石燒嘅好處，就係可以提升牛扒嘅美味程度。牛扒喺自己面前由生燒到熟，鼻腔就充斥住牛扒嘅香味。加上塊石真係好熱，好快就可以煎香塊肉。唔洗用最靚嘅牛扒，都可以有超乎嘅享受。而最重要係成班朋友一齊食，氣氛都零舍不同。

Jayson 攞咗部相機幫我哋同啲食物影相。

「媽媽鋸扒。」

「我有粟米食。」

之後就冇再影相。因為 Jayson 太喜歡舊粟米，所以插咗個鏡頭落去…

配菜及醬汁都係自己攞。食完仲有甜品、餐後酒、咖啡！唔洗三百蚊有咁多野食，雖然除咗經理之外，其他侍應服務麻麻，但都算係物超所值！絕對值得再去多次。



~ Lindberg