生日飯@Angelini

今年生日嘅正日，因為要返屋企食飯，所以 Jayson 媽提早帶我出街食飯慶祝。

Angelini
地址：尖沙咀麼地道64號九龍香格里拉大酒店閣樓
電話：2733 8750

「爸爸，您睇下嗰邊！」

表情交足戲，其實搵我笨，冇野睇㗎… 俾佢笑死。

$258 嘅半自助式午餐，包括自助頭盤、甜品及咖啡，及一款主菜。我好鐘意食自助午餐，因為午餐時段嘅戰鬥力高。而且之後有大把時間休息，晚餐都可以慳埋。真係抵上加抵！Jayson 一嚟到，就除鞋除襪坐喺到食麵包條。好彩我哋坐喺角落，唔係就真係失禮人。

每人有一碗餐湯。今日係番茄湯，濃濃嘅番茄味，諗起都仲會流口水。

Jayson 冇俾錢。但黐我哋食咗啲麵包同芝士。

我唔知點解佢咁鐘意食芝士。咁大舊 Parmesan Cheese，就咁就冇咗。

「Jayson，您唔覺得鹹嘅咩？！」

大人就當然食大人嘅野。呢到有好多唔同類型嘅前菜及風乾肉。意式前菜款式多，新奇又好味。食完都飽飽地。不過啲風乾肉普通。鹹得嚟唔夠香。

主菜方面，Jayson 媽食鱸魚。煎得好香，夠鹹好好味。薯蓉亦都好香滑，令到佢食得好開心。

而我就聽 Jayson 媽介紹，食天使麵。食落口彈牙得嚟唔似新鮮貨色。原來呢到係用稱得上「意大利麵王」 Spinosi 嘅意粉。呢隻牌子嘅意粉除咗用特選嘅麵粉（由小麥比較硬嘅中心部份做出嚟嘅麵粉）之外，仲落咗好多蛋。不過意粉汁蓋過咗啲蛋味，我食唔出。麵條比粗糙，所以非常上「上汁」。我個人比較喜歡滑嘅野（例如布丁、Jayson 塊面等），不過呢個都粗得有道理。配上魷魚粒茄汁，超滿足。

「爸爸，我影您呀。」

甜品方面，唔算好特別。Napoleon 同 Tiramisu 都好味。但舊 Cannoli 就接近難食喇。

飲埋杯咖啡落肚，就真係完美的一餐。好開心…

~ Lindberg