病況更新 乙型肝炎的治療

因為肝酵素回升，上年九月嘅時候，我要作出人生嘅一個大決定：就係食唔藥。一食，就要食一世。除咗要考慮副作用之外，如果病毒變種，就要換藥。喺作出咁大嘅決定之前，當然要慎重研究一下先啦。

首先，要理解問題之所在。乙型肝炎帶菌者，係因為身體做唔到適當嘅抗體出嚟。而做唔做到抗體，係決定於啲基因。正所謂：「命裡無時，莫強求…」肝炎病毒會存在喺肝細胞入面，而好多時都會相安無事。但萬一身體唔知「發咩神經」，要打啲痛毒，咁就大鑊啦。第一，佢冇正確嘅武器（抗體），點可能打得贏？第二，佢要打啲病毒，就會打爛啲肝細胞。於是，打唔贏又要不停咁打，肝就會發炎。驗血嘅時候，就會發現有爛咗嘅肝細胞所散發出嘅肝酵素。肝酵素越高，即係個肝發炎越嚴重。之後咪肝硬化、肝癌之類囉。

因此，要諗下點樣先唔會發動啲無謂嘅戰爭。於是，我去見 郭生 嘅外母大人。久聞佢嘅中醫術高明，我想俾佢睇下，會唔會我身體有其他毛病，以致「發咩神經」。經診斷之後，佢話我脾係比較弱。然後佢同我講，中醫藥暫時係無辦法醫肝炎。聽到呢句之後，我差啲想攬住佢。因為好難搵到一個好嘅醫師。某啲草藥係有抗病毒嘅功效，例如蚤休、山豆根、虎杖、大黃、丹參、菁蒿等，都有抗病毒的能力。不過嗰啲藥有效，同食西藥有咩分別呢？大家都係用某啲方法去減少病毒繁殖咋嘛。所以後果和副作用都係一樣。

大人話中藥嘅主旨係「扶正驅邪」。喺我嘅情況，就係整好個脾，身體好，自然無病無痛。所以中藥可以幫到我嘅，就係處理咗我啲「發咩神經 」，令到我唔好打自己個肝。佢開咗張藥方俾我，每日服藥。

幾日後，當我見過教授，我就決定咗食西藥。食西藥嘅原因，並非我信唔過大人。而係佢令我明白到，我嘅問題係身體入面有太多病毒。即使可以搞到自己唔打自己，數唔清（超過可測試嘅範圍）嘅病毒，始終係我身體入面嘅計時炸彈。

教授要我食 Entecavir，每日一粒。每日要食  $70 一粒嘅藥，真係異常肉赤。但肉赤總好過身體有事，唯有之後排政府醫院，希望佢俾藥我食（但要排九個月！！！）。除此之外，大人仲開咗另一條藥方俾我。不過唔係乜野治療用嘅中藥，可以的話就每日飲用。

理論上，肝病病人，中藥係唔可以亂食，因為有機會加重個肝嘅負擔，令發炎更加厲害。但我個人認為，西藥係「治本不治標」，中藥就「治標不治本」。理由係之前所講，西藥直接控制隻病毒，即係治理根源「驅邪」。但對身體其他問題，就置於不理。但中藥喺我呢個情況，又做唔到治本「驅邪」嘅角色。喺未期嘅肝病病人，中藥確實有好顯著嘅幫助。因為佢可以去水腫，治理其他病徵等，令病人舒服啲。但到咗嗰個時候，都冇乜話治標或治本囉。所以我用西藥治本驅邪，喺情況許可下，以中藥治其他本去扶正。

過咗三個月，喺十二月再驗血嘅時候，肝酵素回復正常。病毒數量由 10^7 跌到落 10^3！足足少咗四個零。教授覺得好滿意。最好嘅情況，係只有幾粒。但一定殺唔晒，所以就唔可以停藥。如果停咗的話，有機會又生好多病毒出嚟，而且更有機會變種，到時就仲大鑊！佢話五個月後驗血，情況應該會仲好。

其實仲有其他嘅方法醫肝炎。其中一樣，就係打針。原理同食藥差不多，但就「勁」好多。一個星期一支嘅 Pegasys，打足五十二個星期。有機會清晒啲病毒，清晒就冇事囉。但可惜亦有機會清唔晒。清唔晒就要行番舊路，食一世藥。再加上副作用聽落好恐怖，真係諗都費時。

除此之外，仲有個激啲嘅方法。就係做骨髓移植。呢個做法冇乜人提及過，但實際上係有人（為咗醫血病）試過係得。理由都好合理。骨髓係來自第三者，入面有唔同嘅基因。如果佢有做到對付乙型肝炎抗體嘅基因，咁就有可能「起死回生」喇。同一道理，肝臟移植都可能做得到「一勞永逸」。不過，一定冇人會咁樣做。未來日子，我相信基因改造應該係另一個可行嘅方向。

十二月除咗驗血，我仲做咗個超聲波掃描。肝臟健康，但有少少脂肪肝！一定係前排食得太盡… 要清淡啲啦。唉… 大人喺藥方中，加咗啲山楂，希望可以幫我消下脂啦。因為肝藏入面嘅脂肪，唔係咁易減㗎。唉…

但另一方面，喺我搜集資料嘅時候，我發現咗另一個問題。如果天生嘅基因做唔到抗體，咁打肝炎疫苗咪即係未必有用？！呢個問題困惑咗我好耐，所以叫 Jayson 媽問下佢啲精通病理嘅醫生。一問之下，原來係真㗎！有兩成嘅人，做得唔夠多抗體，甚至根本做唔到抗體。再加上乙型肝炎都有八款咁多（我中咗最常見嗰種），所以即使打咗防疫針，都未必有用。大鑊！等我仲以為 Jayson 實冇事，下下大啖大啖咀落去。醫生話小朋友最好喺大個啲嘅時候，驗一驗有冇乙型肝炎抗體，唔夠多抗體就要補支針。如果完全冇抗體的話，咁就要自己留意啦。佢仲話我之前咁多病毒，真係小心啲好。唉… 點解呢啲野冇人同我講㗎？！希望 Jayson 可以遺傳到佢阿媽啲好野啦（佢阿媽做到抗體）。

乙型肝炎雖然可怕，但只要定期驗血，留意住自己身體嘅情況，唔好令個肝太過操勞，生活都可以好正常嘅。為人父母的話，如果自己係肝炎帶菌者，就要留意下我以上講嘅野啦。祝大家身體健康！



~ Lindberg