雜感

近排四周都好靜。餐廳都明顯靜咗落嚟。除咗啲父母要趕住去買奶粉，股市大瀉、躲避輻射雨等，我相信大家都無乜心情出街玩。寫好咗一半關於啲開心事情嘅網誌，都冇能力完成落去。唉…

每日望住電視報導日本嘅情況，就好似睇住一個好乖嘅小朋友，俾人欺負一樣，而自己就愛莫能助。心入面好難受，但仍慶幸見到人性美好嘅一面。我相信呢啲品格，唔係話學就學得到，反省就立即會有進步。係需要長時間，一代又一代，建立出嚟嘅價值觀。

希望災難會早日過去，日本可以盡早回復昔日嘅面貌。

唉…

尋日，Jayson 契爺同我用咗另一個方法，去支持日本…嘅經濟。

我賣咗舊嗰部白色 NDSL，換咗部黑色嘅 3DS。可惜 3DS 冇白色，否則，我就可以神不知鬼不覺，來一招偷龍轉鳳。

其實我哋嘅做法都唔係冇道理㗎。買多啲日貨，應該係最理性同直接嘅幫助。好一句：助己助人，如果諗真啲，就知道我無亂講。

而正當欣賞人哋嘅人格之際，老豆剛剛打電話俾我。佢話收到個電話，內容類似：

「你朋友欠我哋錢，你做咗佢擔保，咁你幫佢還。二十八萬！」

「邊個朋友呀？」

「邊個朋友你自己唔知？！依家佢喺我哋到，你想點還？！過數定見面俾？！」

「我幾時有擔保過邊個呀？！」

「咩冇呀！你講你個手提電話同地址嚟。」

「你打電話俾我，你唔知我幾號電話？！」

收線之後，就冇再打過嚟喇。天啊！中國人啲傳統美德去咗邊呀？！



~ Lindberg