食吉列，始終你最好

（今日又講食… 所以你可以想像下我個肚腩變成點。唉…）

前日睇完醫生，原本想去大會堂美心飲茶。十二點未到已經人山人海！唯有去等二到。突然想食炸野。食炸野，當然要去世貿嘅 Tonkichi 啦！

日本吉列專門店餐廳
Tonkichi Japanese Restaurant
 地址 : 銅鑼灣告士打道280 號世界貿易中心四樓
電話 : 2577-6617

都好耐無嚟，因為都唔平。點知仲要加咗價，午市又無平！算啦。鬼叫口痕咩。

我叫咗個炸豬扒配麵鼓醬，$138。

「味吉陽一」式嘅炸厚切豬扒就係好好味。首先塊豬扒靚，不過應該都要拍過下。如果我無估錯，應該要好似「味吉陽一」咁，用兩個溫度嘅油炸兩次。唔係就會一係個面燶晒，一係入面唔熟。

配麵鼓醬好好味。我本身唔係大鐘意芝麻，帥尤其是大炒得好燶嗰啲，所以唔係大鐘意佢個自製芝麻豬扒醬。

炸蝦同帶子都唔錯（$188）。不過帶子會出水，會搞到個吉列好核突。

係 Tonkichi 食野好健康，因為有椰菜任你食。椰菜加埋沙律汁好好味。沙律汁有兩種：柚子醋和紫菜汁，兩隻都好味！我食咗三輪！

不過食完之後，我地發現我地個下顎有小小損。可能係啲吉列太過鋒利嘅關係。哈！


~ Lindberg


P.S. 食完隻眼仲好攰，因為右邊枱有個日本姐姐，搞到我目「不停」轉睛。哈！仲撞到劉小惠和湯寶如去食飯喎！