自己公司有幾恐怖？

尋日見咗個朋友嘅朋友，佢都係做飲食，仲要發展得好快。公司有後台真好。

初次見面，我地兩個有講有笑。互相數自己公司嘅恐怖野。有幾恐怖？

（其實都唔恐怖…）

佢公司好有錢，我地就真係仙都唔仙。可能因為咁，我地乜都去到好盡，正所謂物盡其用。除咗人力之外，系統方面，我頭兩年放咗好多時間。除咗自動化，係資料分析都花好多心機，真係每一個數目字，汁都揸埋。當然我老版都好勁，教識我好多野。

開頭以為係人都會咁做。原來唔係。

我同佢講我恐怖到廚房用多咗鹽，數字上都可以清楚話我知。嚟緊公司三個月邊日有幾多錢我都知。就連 audit 同 tax computation，自己都做咗九成。鬼叫我地窮咩。真係窮得恐怖！

佢順話佢公司就先至恐怖。公司大我兩三倍，人手係我六倍。但係公司欠人幾多都唔知。銀行大把錢，但係供應商就喊無糧出。看在我眼中，覺得好好笑，同覺得佢好可憐。

傾完之後，開心嘅係覺得自己行得啱。唔開心嘅，就係人地公司真係好勁。見完佢之後都好羞愧。不過好彩！有救星！

最近係美國請咗個經驗豐富嘅人番嚟。我都要叫佢做老細。其實開頭我都唔知有無用。但係今日佢改咗幾樣野，兩個字：「好得！」之前無試過佢個 pesto，我以為原本嗰個都合格。但係佢只不過係做法改小小，好食好多！之後用佢炒個意粉出嚟，好食到呀！整碟意粉變咗平均嘅翠綠色，好靚靚！（可惜無影相，因為大好食。不出一會就落晒我個肚…）

薄餅底都有大改進，不過仍在努力中。

見到咁，都有小小安慰。不過都預料到執行上會好難。近排見到好多同事都面有難色。唉… 不過任何公司有乜變動，都係咁嫁啦。希望船到橋頭自然直啦。


~ Lindberg

P.S. 最近之前班JA同學好似要選科報JUPAS囉喎。希望大家一切順利啦！