雜感一則

近排發生好多事。所以好想不停寫。有寫得，有唔「捨」得（好爛）。所以又嚟一篇雜感。

1) 好低能… 聽日幫一個好朋友做兄弟。唔知邊個低能仔嘅意見（好似係我），話七個兄弟七隻色，一人帶一隻色嘅呔。《七彩兄弟兵團》…絕呀！我係黃戰士！

不過好彩我無話做《七個小矮人》，唔係就大鑊啦… 哈！明天再報導。

但係講到做兄弟，我地都算專業。揸車、影相、做司儀、搞氣氛，樣樣皆能！收費便宜，有興趣者，歡迎相洽。哈！

2) 好唔知點… 食碗面反碗底嘅事我會唔會做呢？好快就知…

3) 好開心… 我寫咗四百四十六篇文章，終於有一篇上榜啦。好感動。成日話寫 blog 係俾自己睇，或者係俾一啲我想佢睇嘅人睇，自娛成份多。但係知道有人睇，好開心。起碼我嘅記憶，可以活係別人之內，就算幾短時間都好。

4) 好灰… 日日跟個大肚婆係咁食，好大鑊。重咗五磅，唔敢照鏡…

5) 好煩… 公司近排好亂，好頭痕，好想放假。再過兩個禮拜就放假啦！都算係放「產假」啦！哈！

6) 好… 前一排買咗一套西裝。上一套係好多年前買落。好老套。因為返工唔洗著西裝，突然要買一套反而頭痛。四圍問人邊到買。聽朋友介紹去搵，見一套無減價要過萬，又唔捨得。最後好彩都買到，仲好平添！嘻…



~ Lindberg