《C+偵探》故事麻麻地

上星期日走咗去睇彭氏兄弟作品《C+偵探》。見係郭富城，又係偵探片，可能驚嚇就有，鬼就無乜呢。點知又係鬼片！我仲要帶個大肚婆入去睇嫁！救命！

彭氏兄弟作品等於鬼片始終係不變。但係講真，彭順拍得唔錯。套戲非常緊湊。可惜個故事寫得唔好，而且有敗筆嘅地方。

警告：以下會講到小小劇情！

我自己覺得個故事本身應該係一個唔錯嘅偵探片。一張相，入面嘅人相繼死去。邊個係兇手呢？而妙就妙在查一個，死一個。但係個尾有好多野講唔通，或者交代得唔足夠，乜都用隻鬼串通晒。我就覺得就有啲可惜囉。

其實偵探故事唔係一定要寫到下下「密室殺人」先得。故事簡單得嚟拍得有壓迫力已經好有娛樂性。

而敗筆嘅地方係其中一幕。黃德斌係銀行收到一個電話，佢提到一個名。個名係廖啟智片中嘅名稱。對話表現好似同對方好熟。令我誤會佢地一早就識，更令我懷疑廖啟智先係兇手！
如果係我寫，我真係會寫廖啟智先係兇手。如果係咁個故事就會合情合理好多。一早廖啟智就話無錢，而本身嘅殺人動機就係「錢」。部處一個殺另外一個，唔洗自己出手。而且仲可以利用嗰張燒咗個角嘅相。燒咗嘅，咪係廖啟智個樣囉。洗乜出「鬼」呢？想嚇死我咩？！



~ Lindberg