唔識揸自動波！

近排我發現架車好似有啲問題，個逼力有時會發出尖叫聲。於是叫咗做車房嘅親戚，幫我攞部車去檢查一下。因為尋晚佢要開走我架車，我地就交換車揸。上到佢部車先發現，原來我唔識揸自動波！

我 2002 年先走去考車牌。考咗兩次先合格（第一次忽略咗一個重點）。一考到牌就立即叫個親戚幫我搵車，仲指明一定要手波。因為我覺得學得咁辛苦，唔用番好似好浪費。個牌都未夠一個禮拜，我就買咗依家哩架 Civic。當時作為一個新牌仔，加上手波 Civic，啲保費好貴。不過總算揸得好開心，而且 Civic 真係好好揸。非常容易上手同睇位，我第一日就揸咗上太平山頂！當時除咗唔少心甩咗一下尾之外，都算平安無事。

今次係我第二次揸自動波車。第一次係剛剛考到牌，熙爸俾架車我玩咗一陣。尋晚係第二次。原全唔知自己做緊乜…

起步都冇乜問題，不過唔知隻左腳應該放係邊。慢行到第一個彎位前，好自然想轉二波。隻左腳亦都好自然「想」踩落極力子到。但係當然冇極力子啦，因為係自動波。而踩到嘅，竟然係個逼力！成架車突然停咗喺到！好彩後面冇車。旁邊嘅行人用好奇怪嘅目光望住我，瘀到痺…

但我發現自己適應能力比自己想象嘅高。我仲以為我一直都係揸同一架車，揸其他車會唔識睇位，甚至連轉個彎都成問題。不過原來都唔係咁難。但係就成日都想轉波。一到燈位，如果係手波，當然係踩極力子同逼力，入空波，拉手煞車。而自動波，踩完逼力就唔知做乜好。第一次我就拉手煞車，然後入 P （Parking）波。我想信會嚇親後面架車，因為推上 P 波會經過入後波，一入後波，後面嘅倒後燈就會著。見到前面架車，無端端著倒後燈，都咪話唔驚。

過咗一兩個燈位之後，我先發現唔洗咁做。入 N (Neutral 空）波，然後拉手煞車咪得囉！但係其實乜都唔做都得。白痴到爆。

開車去接 Jayson 母子。最後都平安返到屋企。

自己架車檢查過之後，原來冇乜問題。啲尖叫聲係因為塊逼力皮嘅原固。佢幫我裝哩隻逼力皮（racing 皮），剛剛開車時係有會有啲聲。佢幫我噴咗少少油，依家就冇晒聲啦。佢話個逼力仲好新，架車冇問題。佢仲問點解我可以揸到咁新。我係一個車手，當然唔會咁易磨蝕啲逼力皮啦！呵呵呵呵…

不過檢查一下都係放心啲，始終都係載住一家大細呀嘛。



~ Lindberg