福建紅酒燴牛肉飯

早前櫻杏子叫我寫多幾個二人簡單食譜。啱啱覆完佢留言，先醒起今晚個飯咪超級簡單。死火！唔記得影相添！不過唔緊要，因為真係好簡單，唔洗睇相都識做。

其實我哩個紅酒燴牛肉，可以算係自己嘅食譜。因為貪方便，就連參考都費時搵。而煮過咁多次，都未試過令自己失望。咁點解我叫佢做「福建紅酒燴牛肉飯」呢？因為就好似 HKU Lee Hall 飯堂啲碟頭飯一樣，通常都會有一個好勁嘅國家名行頭，例如：匈牙利免治牛肉飯，俄羅斯白汁雞扒燴意粉。而本人係福建人，所以就叫「福建紅酒燴牛肉飯」啦。其實個國家名同碟飯毫無關系，福建冇福建炒飯，廈門冇廈門炒米，所以唔爭在福建冇福建紅酒燴牛肉飯啦。哈哈哈哈！

以下四人份食譜，餸飯一流。真係食幾日，帶埋飯返工都仲得。哈哈哈！

材料（四人份）：
無骨牛仔骨 一包（約一磅半）
洋蔥 一個切絲
紅蘿蔔 兩條
茄醬 大半瓶
紅酒 100ml
月桂葉 兩三片
鹽及黑椒碎

「無骨牛仔骨」個名有啲怪。無骨嘅牛仔骨咪即係…牛仔？哈！我喺吉之島買嘅。可以用牛肋肉，不過「無骨牛仔骨」快啲熟同埋嫩好多。

首先用少少油炒軟啲洋蔥。可以落少少糖去炒。然後落牛仔肉，炒到啲肉同洋蔥表面燶燶地（caramelization），之後個汁先夠味。紅蘿蔔用滾動切法，切到一舊舊，落鍋一齊炒一炒。之後就可以落紅酒。紅酒，我通常會買一支支細細支（200ml 左右），煮一半，飲一半。不過其實我唔飲酒，另外一半通常都係過幾日用埋佢。落酒嘅原因，係酒會同肉汁入面嘅油產生化學作用，釋放出一啲獨特嘅香味。

倒大半支茄醬，幾片桂葉。大火煮沸之後轉細火，炆半個鐘左右，放鹽同黑椒碎調味。如果茄醬酸，可以加少少糖。食得！簡單嗎？



~ Lindberg