點先可以慳啲油呢？

為咗統治地球嘅大業，我自己對於財政上嘅管理特別注意。除咗屋企都會用會計軟件（家用版）之外，我揸車用幾多油都會有記錄。前嗰幾日去入油，發現差不多一缸油要成六百幾蚊。望一望個里數錶，先揸得嗰三百幾公里。心諗，莫非我駕駛技術差咗，唔覺意用多咗油？！

睇番個表就知唔關我事，而係因為油價不停咁升。我記得以前一公里先用 $1，自覺一架舊車有咁嘅表現都算唔錯。嗰時一公升油先至 $10。但近幾次入油，越入越貴。最近一次，足足要 $17 一公升。平均要用 $1.81 先行到一公里。而今缸油仲貴過上次，所以一定更大鑊。唉…
油價咁升法，點先可以慳啲油呢？我想喺到分享一下我嘅心德：

1) 注意保養
如果架車保養得好啲，啲油都會燃燒得好啲。例如如果個引擎空氣濾芯唔乾淨，空氣入得唔到個引擎，咁啲油就自然燃燒得唔夠盡啦。哩樣我自問做得幾好。

2) 減輕負擔
我放好多垃圾喺個車尾箱到。貓沙呀、Jayson 架車仔呀、十年都唔用嘅璧球套裝呀、等等。減輕重量就唔洗踩咁大腳油啦。除咗垃圾之外，入油都可以入滿半缸就算，咁架車又會再輕啲。不過因為懶，睇怕我都唔會點郁。嘻… 而且我鐘意架車重啲，感覺會穩定少少。

3) 油門控制
當然唔好貪興奮，下下大腳大腳咁踩油啦。慢慢加速，同埋保持平均速度就最好。而且迫力都會用小啲啦。除此之外，用適當嘅排檔，行適當嘅速度，都可以減少不必要嘅浪費。

4) 空波滑行
哩招高呀。當車行夠一定速度，就入空波等佢自己去。喺燈前用就比較實際，等佢自己流去紅燈前停。不過如果俾我師傅聽到一定打死我！因為佢話一入空波，架車就受唔到引擎控制，即係失速。如果有乜事發生，要行要停，會好危險。所以千祈唔好學！

5) 避免塞車
行得市區多，成日都遇到塞車。架車一起動一停會用好多油。如果有得選擇，寧願行遠少少都唔入去塞車地帶。

6) 檢查呔氣
如果車呔唔夠氣，同地面嘅接觸同摩擦力會大咗。咁要推郁架車亦即係吃力咗。

7) 唔開冷氣
喺香港，熱天唔開冷氣當然會死人。不過如果陰天或者落雨，都可以試試。喺窗上面裝個雨擋就唔怕濺雨入嚟啦。

8) 留意特別優惠
其實我上面個表唔係我實際要俾嘅錢。因為我用某張信用卡有減價優惠。而某啲大公司都會幫員工搵啲「員工福利計劃」，入油會平少少。留意一下，年終都可以慳少少。

9) 換車
環保車當然可以慳番啲啦，如果有錢換的話…

除咗以上 9 招，仲有乜野計仔呢？

「爸爸，點解您哩頭話慳錢，嗰頭又走去買玩具嘅？」

「咁慳得咁辛苦，當然要買啲野嚟獎勵下自己先得㗎嘛。」



~ Lindberg