又香又甜嘅南瓜粥

一睇個樣，就知又係阿仔啲食物。不過真係幾好味，南瓜營養豐富，含維他命A、及胡蘿蔔素。煲出嚟嘅粥又香又甜。大人都好啱食。

材料：
白米：3 湯匙
南瓜：數小塊
蛋黃：半隻
水：1 杯（不過我發現之後唔係好夠，再加上滾瀉咗少少。所以之後加多一杯左右。）

煲一人份嘅粥真係好難。我煲過一次之後，就好想買過個識得煲粥嘅電飯煲仔。
不過個粥都算容易做。先洗好米，加水，開電飯煲。

我等水滾先落南瓜。我個電飯煲仔都幾大火，可能係因為米少嘅關系。要睇實，耐唔耐就攪下，唔好俾佢黐底或者滾瀉。因為我滾瀉咗少少水，所以我要再落水。感覺有啲似煮意大利飯。

南瓜都好快熟。一熟就可以壓爛成糊。

煲到啲米開晒花咁，就可以落蛋黃。

收火，攪勻就食得！會聞到陣陣南瓜嘅香味。

不過與其話係粥仔，我覺得似飯仔多少少。第一次見婆婆煲都有啲出奇，因為一啲都唔似我地出街食開啲粥。雖然都已經好爛，不過冇乜水份。但係 Jayson 又食到喎。因為驚佢唔夠水份，我地之後都要佢飲番多啲水先得。

~ Lindberg