一人一件新衫

尋晚行 Uniqlo，Jayson 媽想買啲夏天衫。我一路行，個心就留咗喺下面間 Toy 'R' Us 嘅 PS3 前面。行到童裝部，見到一件衫，想買俾 Jayson 著。而 Jayson 媽就毫無收獲。

之後佢行過見啲卡通印花圓領短袖衫，我心諗：咁大個人仲著印花衫…？不過睇真啲，嗰啲印花又真係要 30mething 先會識得欣賞，啲公仔全部都係細個嗰陣睇嘅公仔書。而竟然又真係俾 Jayson 媽同我都揀到件啱心水嘅喎！

Jayson 媽係安達充老師迷。最鐘意嘅作品就係 Rough。原來都已經係 1987 年嘅作品。

我嗰件除咗因為係紅色之外，仲要係藤田和日郎老師嘅《潮與虎》。老師啲作品都幾神怪，好多時都會用咗啲日本嘅民間傳說。故事情節豐富，雖然有時好似豐富過頭，不過都算有個完整嘅結尾。件衫除咗前面有潮與虎兩個主角之外，後面嘅頸位仲有隻九尾狐。

而我就幫阿仔揀咗件蝦肉色背心。著上身，露出一對肉臂，一定好夏天（仲好性感添！）。

~ Lindberg


P.S. 今日幫阿仔磅重。 20.2 磅！到咗 75% 條線！變咗肥仔嘜…