一起「征服世界」吧！

見到《暗黑熱血》有如此一個 Blog Tag，我又點可以唔自薦回應一下呀？有興趣征服世界嘅朋友（或者敵人），都可以一齊嚟玩下呢。

1. 什麼時候開始想征服世界？
應該係自從喬治布殊上台之後。既然咁嘅人都做到米國總統，就不如由我嚟統治地球啦。

2. 征服世界為了什麼？
用最唔完美嘅方法，打做最完美嘅世界。為所有生命嘅幸福同快樂而作戰。

3. 你做過最接近征服世界的事？
生咗 Jayson。湊仔艱辛程度，令我寧願去征服地球。而生咗 Jayson，亦都向征服世界踏出一大步。我學習愚公思想（移山嗰一位），我不入地獄，誰入地獄。自己做唔嚟，仲有我啲子子孫孫繼續我嘅宏志。問你死未？！

4. 人才、資源、技術力，三者中那樣最重要？
一定係人才！有咗人才，後面嗰兩樣野遲早都會有！就好似劉備一樣，有咗孔明之後，資源呀，武器呀，咪自動自覺飛埋嚟啦。呵呵呵呵呵…

5. 怕有英雄人物出來嗎？
最多咪係「節瓜俠」。不過只要將自己打做 成「英雄人物」，到時咪冇「英雄」會挑戰我囉。嘩咔咔咔咔咔咔…

6. 有沒有找過其他志同道合的人合作達成夢想？
有搵朋友傾過，不過聽完之後，佢地想送我入青山…

7. 暫時在征服世界之路上最大困難是？
搵唔到人聽完我大計之後，唔會送我入青山…

8. 秘密基地想設在那兒？
最理想當然係瀑布後嘅山洞。不過出入唔方便，近近地屋企，或者地鐵沿線都唔錯啦。

9. 你覺得征服作戰有什麼必要器材？
「人型甘地」。冇錯，就係印度嗰位甘地。記得十幾年前玩過一個電腦遊戲（唔記得叫乜名），好似世界大戰咁。玩家可以是但選擇一個國家，做國家領袖，如美國嘅列根，侵略其他國家。最大鑊就係對著印度嗰個甘地。甘地的主要信念係「精神的力量」、「真理之路」、「追求真理」，人地一聽就一窩蜂咁飛埋去。喺遊戲中，佢就係咁撬走晒我啲人民，於是就冇人保護自己個國家，兩個飛彈就俾人搞掂咗！唉… 所以我相信只要有「人型甘地」，幫地球人進行思想改造，「征服世界」，指日可待！嘩哈哈哈哈哈…

10. 如果你可以當一個惡黨首領，會選那個組織？
好難選擇。做乜征服世界就一定係惡黨嘅呢？！

11. 你最欣賞最想招攬的惡黨幹部？
賴斯。唔知點解，一提起「惡黨」同埋「幹部」，我第一時間諗起：美國國務卿賴斯。哈哈哈！
好，認真啲！我會要《寵物小精靈》入面隻「喵喵怪」，因為我鐘意貓。哈哈哈！
再認真啲！嗰啲乜乜戰隊嘅對頭人是但一個啦！著得好性感嗰啲呢。嘻…

12. 什麼時候，你會打消征服世界的念頭？
喬治布殊再三連任之時。到時個世界要嚟都冇用。好彩冇咁嘅可能啦。



~ Lindberg