墨西哥風早（晚）餐

我好鐘意食早餐，尤其是西式豐富嗰種。雖然都不外乎蛋蛋腸腸，不過就係鐘意佢俾我一個精神爽利嘅感覺。所以好多時去茶餐廳，即使係下午茶時間，我都會叫早餐食。以前如果想食一頓豐富嘅西式早餐，我地會去灣仔嘅 Harry Ramsden's。$60 左右一份食到你晚餐都可以唔食嘅早餐，非常令人懷念（但已經一早𢴇咗粒）。

近兩年一想食餐勁嘅早餐，就會去 The Frying Pan。通常都係假日走去，好悠閒咁食個早午餐（brunch）。而哩晚係第一次去食晚餐…（定係應該叫番做「早餐」呢？）

The Frying Pan
地址：中環奧卑利街 9 號地下
電話：2140 6333

通常嚟到食早午餐，都會食啲正常啲嘅野。即係啲腸腸蛋蛋同埋多士。今次見係晚餐，就叫個特別啲嘅，叫做 Ranchero Mucho。墨西哥有冇哩個菜，我唔知道。不過用上辣調味汁（Salsa Sauce），同埋牛油果，真係有幾分墨西哥風味。

個辣汁入面有唔少青辣椒，都幾辣。不過蕃茄啲酸味可以中和番少少。蛋下面有塊墨西哥薄餅。蛋黃啲汁加埋啲辣汁，溶入啲薄餅入面，好味到不得了！

我發覺自己好似忘記自己嘅體重一樣。叫咗一大杯朱古力奶，仲有件西多士兩個人分。件西多士用最普通嘅做法，一大塊麵包黏上蛋漿就去煎。加上糖漿或者果醬，好好味（亦都好肥仔…）。非常滿足嘅一頓晚餐！

~ Lindberg