忌廉磨菇湯

忌廉磨菇湯好多人都煮過。我哩個忌廉磨菇湯雖然材料簡單，不過做法有少少麻煩。勝就勝在幾好味，同埋之後有個白汁可以用嚟煮其他野。

哩個湯主要分二個步驟。第一，煮個白汁；第二，煮個湯。先講個白汁：

白汁材料：牛油 2 湯匙
麵粉 2 湯匙
蒜頭 2 小粒切碎
忌廉 1 小包
牛奶 1 包（250 毫升）
巴馬芝士 2 湯匙
鹽 調味

先用牛油同麵粉做個「麵粉糊」。用細火炒香啲牛油同蒜頭，之後慢慢落麵粉攪溶。小心火太大煮燶啲蒜頭！煮到聞唔到麵粉味就可以。

之後就可以倒晒啲忌廉同牛奶落去。開番大個火，慢慢煮溶個麵粉糊。我見啲蒜頭有少少燶（失敗…），所以就用個篩去隔一隔。好彩冇乜影響個味道。

落埋個巴馬芝士同鹽去調味，一滾就可以熄火待用。咁就有個餐廳水準嘅白汁啦。我個白汁嘅份量應該夠煮四至六人嘅湯，或者二人份嘅湯，加一個二人份嘅白汁意粉。

跟住住就煮個湯。

磨菇湯材料（二人份）：
磨菇 大半 盒
些利酒 2 湯匙
百里香 1 茶匙
清雞湯 250 毫升
白汁 隨自己喜好

磨菇用乜野磨菇都可以。我今次喺 Apita 只係買到啲 Baby Portabellas。先用少少橄欖炒軟啲磨菇，然後落啲些利酒。非常之香㗎！（如果有落少少蒜頭起鑊，加鹽同黑椒，咁就已經係一道 Sauteed Mushroom 喇。）

落清雞湯、百里香、同埋白汁。想濃啲忌廉味咪落多啲白汁，想多啲菇味咪落小啲囉。湯一滾，就可以食得啦！

因為白汁同雞湯都已經有鹹味，所以都唔洗落鹽。反而如果太鹹，仲要落番少少水。都唔係好麻煩啫…



~ Lindberg