生日快樂@君悅酒店咖啡室

尋日係 Jayson 媽生日。雖然係有咗 Jayson 嘅第一個生日，不過我地冇預佢一齊去慶祝，因為我地去君悅酒店咖啡室食自助餐。

先講一下尋日下午我特製嘅早午餐。煮完雞肉菜飯俾 Jayson，然後再煮到一頭煙，都算做有誠意呱。

起初都有啲擔心間餐廳好唔好食。見 openrice.com 啲食評好似麻麻地。之前個價錢係星期日至四 6:30pm-10:00pm 成人 $425。尋日不知不覺已經加到 $460 一位。鬼叫我訂唔到香港洲際酒店嘅 Harbourside，訂咗君悅酒店露天嘅 The Grill，天氣又唔好。不過聽（有線嗰個）阿蘇話唔錯，而且我地又未試過，咪去試下囉。

君悅酒店咖啡室 Grand Cafe
地址：灣仔港灣道1號君悅酒店
電話：2588-1234

試完之後真係要為佢平反一下。雖然選擇的而且確唔多，又冇生蠔食，甜品又冇乜特別，但係都有啲特式野食，喺其他酒店食唔到，而且樣樣野嘅味道都唔錯，服務亦非常之好。

頭盤先嚟個自製鵝肝醬。鵝肝醬非常香滑，而且一啲都唔漏。搽多士一流！

哩個自助餐其中一個特色，就係有即切嘅風乾肉。總共有四款肉：Parma Ham、Air-dried Beef、Capicola 同埋 Salami。而我最鐘意都係 Parma Ham，好有油香。加上清甜嘅哈蜜瓜，簡直係人間極品！我總共食咗兩轉。一疊疊嘅 Parma Ham，非常滿足！

之後我飲咗個椰子西施骨湯，個湯簡直係我食咁多自助餐以來，最有水準嘅一個。魚生有基本嘅三文魚、油金魚、八爪魚、甜蝦。而熱食方面雖然真係冇乜選擇，不過都唔錯。我食咗個香芧波士頓龍蝦。龍蝦焗喺個熱盤入面都唔會太差，啲肉好彈牙。我食咗一大隻！好味！蒸魚呀、菜膽雞呀、都好好味！

而比較特別嘅係黑松露鵝肝蒸蛋。黑松露配蛋真係一流，有勁香嘅松露味。好似去咗天堂咁。不過舊鵝肝好似有少少多餘，因為鵝肝啲味都好重，一齊食蓋過咗黑松露嘅清香。我食咗兩杯。第二杯唔知點解冇第一杯咁好食。唔通已經習慣咗嗰種香味？奇怪…

之後我好似慌死食唔飽，整咗碗担担麵。個麵冇落湯，只係用担担麵醬。好好味！但據聞佢啲人參雞湯底都好得，不過真係食唔落啦。

甜品見有薄煎餅，我要咗個香蕉加朱古力雪榚。Jayson 媽整咗幾件餅仔、楊枝甘露、同埋豆腐花。飲埋杯好濃嘅咖啡，我正式反咗肚，浮咗上水面…

每次食自助餐，都好似出錢又出命。今次亦唔例外。食完之後，個肚飽到有啲唔舒服。我地（再一次）話以後都唔食自助餐。不過我地已經諗定下次慶祝，要去 Harbourside 訂番張檯先得！哈哈哈！



~ Lindberg