我的第一個父親節

「阿仔，咁就算幫我慶祝咗啦？」

「仲唔算呀？！同您去飲茶，買玩具（俾我），俾您離遠望下部 PS3，算係咁啦！」

「好感動呀！嗚嗚…」

「最多叫多您幾聲「爸爸」喇！」

「阿仔！我好愛您呀！」

一早起身，就發現阿仔瞓咗喺我身邊。原來佢已經食完早餐，換埋片，等瞓第二覺。逢周末，Jayson 媽都好厚待我，等我可以瞓耐少少。之後佢就會陪 Jayson 再瞓過，而我就開始工作。

我見都已經九點幾，就唯有起身啦。例牌先去電腦面前搞一大輪，見未洗煲粥仔住，就開電視睇《加旋》。睇完無線嗰兩集唔夠喉，開電腦睇多一集。之後就去煲粥。Jayson 開始食有肉嘅粥。首先食魚肉。尋日煲得麻麻地，今日認真啲去煲。好好多！就連姐姐都要試下！

阿仔食完粥仔就一齊出街。著咗新衫，個樣非常神氣！

兩點鐘去到太古城，希望《西苑》唔洗等位。好彩都唔係好多人，等咗十幾分鐘就有位。Jayson 明明已經食飽，仲要同我爭食叉燒包！

「媽媽，我要包包！」

食完飯就去行 Toy "R" Us。Jayson 媽好細心為阿仔選擇玩具。兩個星期之前，我地去 Wise Kid 想買副 Lego。佢有一桶啱歲半玩嘅，不過要成千幾蚊！有冇咁貴呀？！不過 Lego 有另一條線專俾細路玩，叫 Duplo。Wise Kid 冇得賣。雖然都係要歲半先玩得，不過我地只係想搵啲野俾佢揸下，砌下。一桶有七十幾塊，大大塊唔怕食落肚。不過都唔平，要成二百幾蚊！

喺 Toy "R" Us 入面，阿仔不停叫「阿爸」。想氹我買玩具都唔洗落咁重藥呀！哈哈哈！

Jayson 媽仲搵到一副好多野玩嘅玩具，話要鍛煉下佢喎…

而我就買多一隻可以落水俾小朋友玩嘅鴨仔。上面仲有幾舊咬牙膠。今次應該放得入口囉呱…

買咗咁多件玩具俾阿仔，而我只可以離遠望下部 PS3。Metal Gear Solid 4 呀！！！

當 Jayson 媽俾緊錢嘅時候，我同 Jayson 先出去等。咁啱 Jayson 媽撞到相識。佢走嚟我到同 Jayson 玩，話 Jayson 啲節瓜又真係幾勁。開頭我以為係 Jayson 媽啲同事，先知道「節瓜俠」嘅大名。點知原來係舊同學。點解佢又會知嘅？一個謎…

因為夜晚唔想再出街，所以我決定做啲簡單嘅菜。搞來搞去，最後喺 Apita 買咗個薄餅，沙律菜，同埋準備煮個磨菇湯。

個磨菇湯雖然材料唔多，不過煮得好認真。非常好味（食譜後上）。個薄餅好好味！個包裝話用攝氏 250 度嘅焗爐焗五分鐘。我已經預熱咗個焗爐，但係焗咗十分鐘先至有色。不過個薄餅底做得好好，外脆內軟。四十幾蚊一個，好食過 Pizza Hut 好多。

咁就過咗我第一個父親節。好攰，不過都好開心…



~ Lindberg