郭小姐面世

死黨郭先生個女終於出世啦！

「爸爸，我又要去！」

「Jayson，醫院唔啱您去㗎。遲啲先上叔叔屋企探人啦。等爸爸幫您去望一望先！」

「爸爸，您次次見到靚女都係咁講嘅？一去就冇回頭！」

據悉，嗰日正當郭生準備睇荷蘭對俄羅斯之際，阿嫂突然大叫。醫院叫佢地慢慢準備入院。最後早上九點左右入手術室。大夫前一晚都做到好夜，咁嘅年紀仲可以從事啲咁需要體力嘅工作，佢真係好厲害。難怪養和入面有半個場都係佢嘅。

因為位置唔係太好，所以最後都係開刀。母女健康，郭小姐 7.7 磅重，50 厘米長。比 Jayson 當時重一磅，長一厘米。樣子相當甜美。

郭小姐仲未有名。郭生堅持留番個英文名俾個女自己改，而中文名就係公公同爸爸之爭。不過兩個名都…好特別。一個係排球名將，一個係保險公司。厲害厲害… 哈哈哈！

「您無論叫乜名，都係您爸爸媽媽嘅心肝寶貝啦。」

祝郭生一家身體健康，一團和氣！



~ Lindberg