熱辣辣的海南雞飯

前一排日日落雨，見今日風和日麗，於是就一個人去灣仔北食午飯。以前郭生仲喺到嘅時候（我係指佢仲喺灣仔做野嘅時候），我地耐唔耐都會相約去灣仔北嘅泳池附近嘅平台食食盒飯，晒晒太陽。非常之懷念嗰段日子，所以我就走咗去逸東軒，諗住買盒海南雞飯，開開心心食飯去。

逸東軒個外賣部同以前有好大分別。竟然收銀員都冇咗！佢地放咗部打單機喺個收銀位置，客人自己想食乜就自己打乜，然後用八達通俾錢。勁！不過開頭我都懷疑咗一陣，先知應該點做。

海南雞飯一盒 $42 連湯。跟住就行去個平台到。非常風和日麗… 不過好似有啲過份風和日麗…

起初坐落個石地都唔覺有乜野。打開個湯，個湯好熱，太陽光喺湯面反射入眼，差啲盲！跟住攞起盒飯慢慢食。但係越食越唔對路。個屁股好似俾火燒咁！開頭諗住坐耐啲會冇咁熱。點知越坐越熱。陽光射落塊大石上面，而我個屁股就喺上面生煎。漸漸聞到陣陣嘅燒肉香味。

講番個海南雞飯。佢俾胸同翼俾我，好有份量，啲雞好滑，即使我唔記得攞薑茸，都好有味。（死火，唔記得唔好食咁多禽流雞添…）油飯亦都好香。

我以極速食完個飯，之後真係頂唔順，企起身飲埋個湯。食到一身汗。

頂唔順嘅唔止我一個，仲有下面哩位朋友。食咗一半都要企喺到，散一散熱。

如題，熱辣辣嘅午餐唔係指個午餐，而係指我個屁股。對眼因為俾太陽狂曬嘅關系，好耐之後先睇番野。下次都係等秋天先再嚟過。



~ Lindberg