好有誠意嘅姬子皇朝

尋日買咗飛去數碼港睇《奪寶奇兵》。數碼港都叫做近 Jayson 媽公司，如果揸車去都方便。加上間戲院好舒服，所以我地幾鐘意去嗰到睇戲。數碼港唯一一個缺點就係冇野食，有都貴到死。今次 Jayson 媽請我去「姬子皇朝」飲茶。之前佢老板請過佢去食，好似話幾好。我都去過一次參加喜宴，印象都好似唔錯。今次飲過茶之後，簡直要用好好食去形容。

姬子皇朝 La Dynastie Restaurant
地址：香港仔數碼港道100號數碼港商場102號舖
電話：2989 9338

我地叫咗唔係好多點心，因為諗住一陣食爆谷。

先來一個炸鮮魷。好食得好緊要！佢唔用大部份人用嘅「硬過石頭」魷魚鬚，反而用魷魚身。魷魚身好有鮮味，相信唔係雪藏野。炸漿非常之薄，魷魚炸得啱啱好，一啲都唔韌。雖然油咗小小，不過我覺得係個炸漿想做得薄嘅關系，控制油溫好少少唔知有冇幫助。不過我已經覺得好好好好食！

（唔記得帶相機，所以只好用電話影…）

食咗個咁嘅炸鮮魷，成個人精神晒。對嚟緊每一碟都好有期望。蝦餃好大隻，新鮮好味。如果鐘意食一口（咁大）嘅蝦餃，可能會話佢太大隻。我就冇乜所謂，好食就得。

蘿蔔糕有好清甜嘅蘿蔔味，粗粗嘅一條條蘿蔔絲，非常之好味。

至於鳳爪，我比較鐘意啲「市井」少少嘅做法，濃味同炆到好爛。哩到唔算濃味，鹹淡適中，而且唔會甩皮甩骨，做法比較「高尚」。下面啲花生努亦都好好食！

仲有一個奶黃千層糕。起初覺得冇乜特別。望落去似馬拉榚多啲。一放入口，「嘩」一聲叫出嚟。啲奶黃用足料，有好香蛋黃味。一分錢一分貨，非常感動！

因為食得咁開心，於是就叫多個甜品嚟食下。哩到有好多甜品選擇，仲有好多西式嘅甜品。我見有法式燉蛋，同埋法式焦糖布丁。我貪得意就問下經理，因為好多時都係同一樣野，Crème Brûlée，所以我唔知有乜分別。原來佢地嘅焦糖布丁唔用燉蛋，而係用咖啡味布丁。見 $48，同出面餐廳食差不多，於是就叫個嚟食下。又係好好味！就連啲拌碟生果都新鮮好味，非常有誠意。

埋單 $284。雖然貴就貴啲，不過物有所值。比起其他扮高檔次嘅中菜廳，我覺得哩到有誠意得多。加上服務殷勤，有機會一定要再去！



~ Lindberg


P.S. 仲有或兩小時免費泊車㗎！