煙肉蛋香意粉

我見之前整咗啲白汁喺到，加上煮早午餐又煎定咗啲煙肉，咁就最好來一客：煙肉蛋香意粉。

材料（二人份）：
意大利粉
煙肉 4 條
蒜頭 1 小片切碎
白汁 3 湯匙
清雞湯 2 湯匙
白酒 1 湯匙
雞蛋 1 隻
巴馬芝士 2 湯匙
鹽及黑椒 調味

其實真正嘅煙肉蛋香意粉，係唔用白汁。只有雞蛋、芝士、同埋意大利煙肉。不過我覺得加少少白汁會香滑好多。而煮法都好簡單。

第一個步驟當然係煮意大利粉，煮到九成熟就可以去過冷河。然後煎香啲煙肉，煎到乾身就可以攞去切成細細粒。

跟住就用蒜頭起鑊，放番啲煙肉落去。

然後就可以落意大利粉。落啲清雞湯同白酒去煮一煮佢。跟住就可以落啲白汁。鐘意多啲汁可以落多少少。不過唔好落太多，因為一陣仲會落雞蛋。

見差煮好晒就可以熄火。熄咗火先落一隻攪勻咗嘅雞蛋。

之後不停攪，用啲餘溫整熟啲蛋。千祈唔好煮得過熟，唔滑就唔好食。有需要的話，落啲鹽調味。上碟時再落啲巴馬芝士同黑椒上面。食得！應該會有好香嘅煙肉味同蛋味。

~ Lindberg