Max Payne

Max Payne 係我其中一個最鐘意嘅 PC 遊戲。最近被拍成電影，不日公映。

哩個遊戲係 2001 年， Remedy Entertainment 出品。當時可算係非常創新。對於我地香港人嚟講，十足十玩緊吳宇森導演啲電影。雙槍，插水式飛身，最緊要係 Bullet-Time。Bullet-Time 應該係參考 1999 年嘅 The Matrix 入面嘅慢動作。喺遊戲裡面，一按右邊嘅滑鼠鍵就會入 Bullet-Time。周圍都會變成慢動作。你可以飛身避子彈，又可以慢慢瞄準敵人嚟射。當時真係非常過癮。

除此之外，故事都非常吸引。警察、臥底、毒品、含冤、報仇。製作亦好有「電影感」。我唔記得係第一，定係第二集，其中一幕俾人打咗支迷幻針，要靠聽聲喺左邊喇叭嚟，定右邊喇叭嚟行出迷宮。非常迷幻。

電影選角方面好似唔錯。Mark Wahlberg 做 Max Payne，都幾合適。前一排睇咗佢嗰套 The Happening，都唔錯。到時電影一出，一定要去捧一捧場。



~ Lindberg