花樣少男少女茶聚 之 後會有期

經過前日嘅聚會之後，相信好多人都好似我地咁，意猶未盡。其實諗落趣嗰日真係幾搞笑。

因為當日我要返上寫字樓攞啲贈品，一返到會場已經有好多人。雖然有好多陌生嘅面孔，不過大家冇點樣互相介紹。其實我地各自之前都有諗過，係唔係應該自我介紹一下呢？但大家好似一見到個小朋友就知個大人係邊個，咁都唔洗介紹啦。哈哈哈…

我記得我一入到去，都未搵番自己個仔，就分別見到比比同 Hayden。諗都冇諗就一支箭飛埋去同佢地玩。而兩位爸爸都唔知點解知道我係 Jayson 嘅爸爸。當時都冇為意。但事後好驚… 幾時俾人點咗相都唔知呢…？

見大家都未玩夠、未抱夠、未傾夠、未影夠、未咬夠，三娘尋日朝早舉行緊急會議，商討「一個墟製作公司」嘅未來動向。

原本我有個提議。見各位都咁鐘意影相，我地可以等秋涼時份，一齊去戶外影下相。有啲地方都幾好，例如科技大學，有草地，有水池、有飯堂。到時 Can 可以指導下我地，互相幫對方影下沙龍，攰又可以坐低食下野，休息下。不過三娘話要等到秋天實在太耐啦。要快！哈哈哈哈…

不過又真係嘅，講得嚟都係一兩個月後嘅事。莎莉都有個好建議。佢（唔知點解）有啲屋苑會所証，入面有啲兒童遊樂設備。一齊玩都幾開心。

經過今早嘅特別行動會議之後，我地希望可以一個半月左右搞一次活動。大概好似以下咁：

8 - 9 月：未諗到
10 月尾：扮鬼扮馬，可愛BB玩轉萬聖節
12 月：聖誕聯歡會
1 - 2 月：洗劫已婚人士集會

大家又有乜野建議呢？太多野想做，太少時間啦！

P.S. 原本哩篇係尋日寫。不過覆 Blog 覆得太開心，寫咗個頭，寫唔晒個尾。哈哈哈…



~ Lindberg