The Dark Knight 好好睇

今日去咗睇 Batman。其實開頭冇諗過入戲院睇，不過買唔到 Hancock 嘅飛，唯有睇 Batman 啦。我唔係太鐘意 Batman，因為佢太黑暗，睇完唔多開心。套戲差不多兩個半鐘。出乎意料嘅好睇。

Jayson 媽冇睇過 Batman Begins，於是我用食午飯嘅時間講咗個故事大綱過佢知。其中一個會睇 Batman 嘅理由，就係想睇 Heath Ledger。第一套睇 Heath Ledger 嘅電影應該係 A Knight's Tale。非常靚仔。當日聽新聞，知道佢嘅離去，都覺得非常突然。睇過佢喺戲中演繹嘅 The Joker 之後，更覺得係天妒英才。Heath Ledger 真係做得好好，應該話非常好，而且絕對唔洗俾同情分。首先，我原全想象唔到，一個靚仔會變成咁嘅樣。

其次佢真係可以話演得入型入格。The Joker 嘅陰森同瘋狂，演繹得非常出色。而且加入好多小動作，令到角色更加有說服力。比起以前 Jack Nicholson 扮小丑呢個角色，有過之而冇不及。

而套戲由頭到尾都非常緊湊。雖然有幾幕好似交待不足，有少少唔明，要之後諗番轉頭。不過問題不大。影香港嗰幕，充份表現出「再見-唔到-藍天」嘅香港。高處影埋去濛查查。不過之後個夜景真係影得幾靚。我覺得呢兩集 Batman，最大嘅改進，就係用現實實景，唔再係好似漫畫入面啲奇奇怪怪嘅大廈。令個故仔更有代入感，而唔再係一個遙不可及嘅罪惡城。

片中真係有陳冠希喎。做類似帶位嘅路人甲，仲要唔係鏡頭嘅焦點，濛查查…

雖然故事最後都係邪不能勝正，不過 Batman 嘅負擔就越嚟越重。亦繼上一集，加深咗對 Batman 刻畫成一個黑暗守護者、黑武士嘅形象。唔錯唔錯。



~ Lindberg