我與 iPhone 的兩個星期

用咗 iPhone 兩個星期有多。第一個感想係… 俾自己搵咗笨。

以下係一啲用後感。但睇之前，先要明白：

• 我係一個忠實嘅蘋果電腦用戶。
• 我用緊無限數據傳送計劃。
• 我有用 MobileMe。
• 有用 MobileMe 嘅 Push 功能。
• 有用 iPhone 嚟查閱及回覆電郵。
• 會上網，不過唔多。
• 會用嚟打機，不過唔多。
• 試過用嚟睇 YouTube，但係好少。我未至於咁無聊。
• 聽歌多。
• 唔開 Wifi，全程用 3G。
• 有開藍芽。

而用後感係：

• 自己太豪。一個月 500MB 嘅用量其實應該好夠。我用咗兩個星期，都算用得幾盡，不過都係得 120MB 左右。好難去到 500MB。早知就用平啲嘅月費計劃啦！而且如果用得到，相信就應該會有另一個問題，冇電！
• 每日都要充電。我都唔算講好多電話。試過一日唔充電，第二日下午就唔夠電。
• 開 SMS 好慢。
• 中文手寫輸入法認字唔錯，不過真係用起上嚟好慢。我又唔識打倉頡，所以有時都寫到發脾氣。
• 坐地鐵睇戲都幾過癮，不過俾左右嘅人望住晒就好唔自然。
• 配合 iPhoto 真係一流。阿仔嘅相全部都喺我手中。要幾時俾人睇都得。
• AGPS 加 Google Maps 好正。雖然有時都搵唔到自己係邊，不過都已經好好玩。而且可以用來搜尋食肆餐廳，雖然有時啲資料冇人更新，不過都叫做有啲用啦。
• 香港嘅 iTunes Apps Store 好少軟件。不過最大問題都係「冇信心」去買。例如因工作上嘅需要，我需要一個公制對算器。正想俾錢買一個之時，過幾日就有個好似好啲嘅。最後，仲有個唔洗錢嘅添！
• 以前部 Treo 可以閱讀及處理文件，而 iPhone 就唔得。想睇個 pdf 文件，要電郵俾自己，然後喺 Mail 入面睇。救命…
• 可能部電話大部（或者我大腿肥壯），震咗都唔覺。試過幾次錯過電話或者短訊。
• 影相質素唔錯。加埋 Twitter 即時放相上網，死未？！

"Eating 乾炒牛河 and gtalk to Fred with iPhone."

整體上嚟講，我都好滿意部機。因為作為一部記事本，我部 Mac 有嘅資料，如電話、日程，部電話都有齊。非常方便。而且最重要係，無聊時又多一件玩具可以攞出嚟玩。不過俾咗最高月費就好似真係笨咗囉。



~ Lindberg