MySinaBlog 三周年紀念

連續俾人踢中同一個位，好痛呀！白雪同 Jo 分別醒我兩腳。咁我就嚟分享一下啦！

1. 你寫 Blog 有多久？ 最初為什麼會有開始寫Blog的念頭？
起初寫 Blog 係喺 Blogger。我嘅綽號係「人有我有」，當時見郭生玩，我就玩埋一份。第一篇文章係 2001 年 9 月 3 日。當時用英文寫，都係啲生活日記。（非常）斷斷續續咁，寫咗幾年。

兩年前搬咗過嚟。搬嘅原因係喺 Blogger 真係自己寫俾自己睇。可能大部份 Blogger 用家都係老外。對住道牆講野，好灰。所以我想「地區化」少少。試過 MSN 同 Sina，發現 Sina 有一班幾好嘅網民。除此之外，Sina 個介面比較簡潔。比起 Yahoo 嗰邊簡單好多，唔會睇到眼花花。所以就開始喺 Sina 寫。

起初都係寫日記。之後多咗個節瓜俠。加上我想統治地球好耐。咁咪有：「節瓜俠大戰 Kidad 王」囉。

2. 寫 Blog 至今，最難忘的事是什麼？
識到白雪。真係咪講笑。寫野寫到識到個同月同日嘅網友，真係覺得好新奇！不過後來發現圍內都仲有幾對喎。世界真細小呀！

其實真係多得「節瓜俠」。冇佢，真係搵鬼睇呀。而我就識唔到唔多朋友啦。嗚嗚…

3. 你覺得寫 Blog 最重要的元素是什麼？
咁要睇下想寫俾人睇，定寫俾自己睇啦。寫俾自己睇，就要用心去記低自己嘅野。不過唔可以用寫作嚟鑽牛角尖。而寫俾人睇，就更加要用心，諗下讀者嘅感受，否則搵鬼睇你寫嘅野咩！而我以前係前者。依家前後都有。哈！

4. 請用一個詞語 / 東西形容你的 Blog。為什麼會有這樣的想法？
自我挑戰、五行欠打。成日對住部電腦，仲唔係自我挑戰，想找死呀？

5. Blog 在你的生活中擔當著什麼角色？
侵略地球嘅幻想空間…

6. 你覺得自己和 MySinaBlog 的 Blogger 們有著怎樣的關係？
其實除咗會留言嘅朋友，我都唔仲有乜人會睇我個網誌，所以唔知佢地會點睇我呢到。而其餘叫得做網友嘅 Blogger，當然就係朋友啦。我覺得寫得網誌嘅，好多時都攞自己真實嘅一面嚟示人。正因為咁，可以睇到對方最真嘅一面。做到朋友，當然最開心啦。

正所謂：「人生有個真正朋友的確好極！飲勝！」



~ Lindberg