豆渣的另類用途

早前莎莉介紹過，做豆漿嘅豆渣可以用嚟整豆渣煎餅。但估唔到豆渣仲有另一個用途，就係俾人掟落我架車到。唉…

因為真係慘不忍睹，所以冇影到相。事發係晚上十點半左右，我返屋企開車去接 Jayson。喺婆婆屋企樓下泊低。上樓落樓唔超過十分鐘，落嚟見到擋風玻璃被一層白色嘅粉末所蓋住。起初以為有細路玩噴雪，不過夏天玩乜鬼噴雪呀？！摸一摸，聞一聞，原來係豆渣！

當時我嘅心境好平靜。公屋地方，上面冇一早掟部雪櫃落嚟都算係咁。見架車冇穿冇爛，於是就想同 Jayson 盡快返屋企。用水撥推開啲豆渣，就準備開車。準備開車時聽到樓上有個女人喺到鬧：「成日都喺到嘈嘈嘈…！」啊… 原來啲豆渣喺上面嘅人表達佢嘅不滿。唉…

老實講，我架車一啲都唔嘈。雖然有條好粗嘅死氣喉，不過原全冇聲，得個樣。加上我都驚嘈親樓上附近嘅住客人，開關門都好輕力，而且防盜都唔開聲。咁都話我嘈，就真係冇辦法。相信嗰位女士都應該有佢自己嘅「問題」，所以我都唔怪佢啦。

返到屋企，我入咗幾樽水，沖走大部份嘅豆渣。不過仲有好多。而每日同我抹車嘅阿嬸又唔會洗得到。前幾日見落好大雨，我就立即沖落街飛一轉。點知一出車就停雨。唉…

之後有日又落大雨，我就停出街俾雨淋。不過有好多位都淋唔到，仲有好多豆渣。我睇都係唔懶得，要打幾桶水嚟淋乾淨先得啦。唉…

~ Lindberg